На тэрыторыі былога калгаснага саду ўжо разбіты ўчасткі, праводзяцца работы па стварэнні пешаходных дарожак: здымаецца верхні слой глебы, пачынаецца завозка пяску. Пасля вясенняй пасяўной работы павінны актывізавацца. У хуткім часе будзе высаджана маладзёжная алея і акультураны так званыя альпійскія горкі.
Як расказаў старшыня Пацейкаўскага сельвыканкама Сяргей Цвірко, добраўпарадкаванне праводзіцца круглы год. Ніколі не адмаўляе ў дапамозе мясцовае сельгаспрадпрыемства – ААТ «Прагрэс 2010», жыхары сельсавета, у тым ліку і дачнікі.
Напрыклад, па ініцыятыве жыхароў вёсак Кацельнікі і Кудзінавічы праведзены суботнікі з іх непасрэдным удзелам па расчыстцы пустуючых домаўладанняў.
На могілках каля былой вёскі Пнівада пры ўдзеле грамадзян, чые родныя там пахаваны, зроблена расчыстка тэрыторый ад хмызняку, за кошт добраахвотных узносаў устаноўлена 80 м агаро-джы. А на могілках у вёсцы Кацельнікі – 75 м.
Па ініцыятыве жыхароў вёскі Какорычы ўласнымі сіламі расчышчана пойма ракі Чайка, якая працякае па іх населеным пункце.
Правядзенне суботнікаў даўно стала традыцыйным і для прадстаўнікоў сельвыканкама, сацыяльнай сферы, паста МНС, мясцовага сельгас-прадпрыемства.
Педагогі і вучні Пацейкаўскай СШ праводзяць урокі працоўнага і патрыятычнага выхавання падчас навядзення парадку ля помнікаў у вёсках Жавулкі, Ржаўка, аграгарадку Пацейкі. Нядаўна Пацейкаўскім сельвыканкамам прынята рашэнне аб рэканструкцыі і добраўпарадкаванні памятнага месца – парк «Пажарышча», які знаходзіцца на цэнтральнай вуліцы вёскі Жавулкі. Парк калісьці быў заснаваны мясцовымі жыхарамі на месцы спаленых і неадноўленых хат, там былі высаджаны дрэвы, устаноўлена агароджа ў памяць пра спаленых 512 аднавяскоўцаў. З дапамогай Капыльскага РБУ, ААТ «Прагрэс 2010» і СФГ «Бандыка» святое месца будзе адноўлена.
Акрамя таго, як адзначыў Сяргей Цвірко, з пачатку года на тэрыторыі сельсавета спілавана 40 аварыйных дрэў, з дапамогай насельніцтва знесена 8 безгаспадарных домаўладанняў, захаваны тры стыхійныя сметнікі, знесена з заменай 184 м старой агароджы, выдадзена 57 прадпісанняў на падтрыманне належнага парадку.
Сяргей КОЗЕЛ
