Прымеркавана яна да 76-й гадавіны вызвалення Беларусі ад нямецка-фашысцкіх захопнікаў і Дню Незалежнасці Рэспублікі Беларусь (Дню Рэспублікі).
На выставе можна ўбачыць паштоўкі, канверты і плакаты розных выдавецтваў, якія распавядаюць аб гераізме, мужнасці і стойкасці савецкіх людзей пры вызваленні Беларусі. На друкаваных музейных прадметах прысутнічаюць традыцыйная сімволіка свята (Георгіеўская стужка, сцяг Перамогі, святочны салют, ордэны і ўзнагароды, кветкі бэзу і гваздзікі і інш.), віншаванні са святам, розныя лозунгі («У плённай працы ўвысь з руін ты ўзняўся горда. З Днём вызвалення, Мінск, мой гераічны горад!» або «Слава савецкім ваярам-вызваліцелям Беларусі!»). На абарачэннях паштовак можна сустрэць цёплыя віншаванні ветэранаў вайны са святам, сярод якіх часта сустракаюцца пажаданні чыстага і мірнага неба над галавой.
Самы «найстарэйшы» экспанат на выставе - юбілейная картка, выпушчаная да 25-годдзя вызвалення Беларусі ад нямецка-фашысцкіх захопнікаў, якую ў фонд музея ў 1999 годзе перадаў капылянін, старшыня Капыльскай раённай арганізацыйнай структуры ДТСААФ Аляксандр Касінскі. А якая выстава без атрыбутыкі ваеннага часу? Акрамя тэматычных друкаваных экспанатаў тут прадстаўлена салдацкая пілотка, пляшка і кацялок з лыжкай.
Андрэй Лятчэня
- Галоўная ідэя выставы - захоўваць гэту гераічную спадчыну, баявыя традыцыі беларускага народа, перадаваць новаму пакаленню самае святое пачуццё – любоў да Радзімы, суверэннай і незалежнай Беларусі, - распавядае навуковы супрацоўнік Капыльскага раённага краязнаўчага музея Андрэй Лятчэня. - Прыходзьце і пазнаёмцеся з выставай! Яе таксама можна паглядзець онлайн на сайце раённага краязнаўчага музея.
Таццяна БОХАН