Ля помніка воінам-вызваліцелям у райцэнтры адбыўся мітынг з удзелам прадстаўнікоў раённай улады, працоўных калектываў, грамадскіх арганізацый і жыхароў горада.
На мерапрыемстве з урачыстай прамовай выступілі старшыня Капыльскага райвыканкама Сяргей Пілішчык, навучэнка сярэдняй школы №2 г. Капыля ім. Т. Гартнага Аліна Мароз і начальнік адасобленай групы Капыльскага раёна ваеннага камісарыята Нясвіжскага і Капыльскага раёнаў Сяргей Маргалік.
З Днём Незалежнасці павіншаваў старшыня райвыканкама Сяргей Пілішчык
Ад імя моладзі раёна выступіла Аліна Мароз
Да ўдзельнікаў мітынгу звярнуўся начальнік адасобленай групы Капыльскага раёна ваеннага камісарыята Нясвіжскага і Капыльскага раёнаў Сяргей Маргалік
Прысутныя ўшанавалі памяць загінуўшых хвілінай маўчання, усклалі да мемарыяла вянкі і жывыя кветкі.
Увечары святочнага дня для капылян і гасцей горада была падрыхтавана забаўляльная праграма на плошчы Леніна. Тут працавалі пункты грамадскага харчавання, гандлёвыя кропкі, выставы-продажы, гульнявыя атракцыёны. Аматары музычнай творчасці змаглі атрымаць асалоду ад тэматычнага канцэрта «Мы завемся – беларусы!». Для гледачоў прагучалі нумары ў выкананні народнага жаночага вакальнага ансамбля «Аліра», Вольгі Даманскай, Вячаслава Курчыка, Валянціны Зарэмбаўскай, Юліі Навумовіч, Наталлі Фінке, Кацярыны Шкурынскай, Таццяны Максіменка, Віктара Бярновіча, Кацярыны Грышкінай і Аляксандра Карповіча. Яркім фінальным акордам канцэрта сталі нумары ад народнага вакальна-інструментальнага ансамбля «Замкавая гара».
А кульмінацыяй свята стала выкананне Дзяржаўнага гімна Рэспублікі Беларусь у рамках акцыі «Спяваем гімн разам».
Аксана Міхайлоўская