Ва ўшанаванні тых, хто быў на перадавой у складаны перыяд пандэміі, прынялі ўдзел прэм'ер-міністр Рэспублікі Беларусь Раман Галоўчанка, старшыня Мінаблвыканкама Аляксандр Турчын, намеснік старшыні Савета Рэспублікі Нацыянальнага сходу Анатоль Ісачэнка і першы намеснік міністра аховы здароўя Дзмітрый Піневіч. Урачыстае ўзнагароджанне медыкаў адбылося ў Палацы культуры прафсаюзаў.
Віншуючы прысутных у зале, Раман Галоўчанка адзначыў:
- На сістэму аховы здароўя ўсёй краіны прыйшлася сур'ёзная нагрузка з-за каранавіруса. Але мы здолелі ў самыя кароткія тэрміны перабудавацца для вырашэння новых задач. Сістэма аховы здароўя працуе выразна, як адзіны зладжаны механізм. Гэта быў добры ўрок і добрая навука, як трэба рэагаваць на надзвычайныя сітуацыі. Мы ўдзячны за вашу штодзённую напружаную працу і высокую самааддачу, за прафесіяналізм, доблесную працу.
- Задача ўлады - дапамагаць медыкам якасна выконваць сваю працу – далучыўся да віншаванняў Аляксандр Турчын. - Успамінаю той перыяд барацьбы з каранавірусам. Вы на перадавой, мы дапамагалі, чым маглі. Можа, атрымлівалася не ўсё, але мы шчыра стараліся - дзякавалі, рабілі падарункі за працу. І гэта не разавая акцыя. Медыцыне мы ўдзяляем самую пільную ўвагу: абнаўляем аўтамабільны парк, будуем і рамантуем ўстановы аховы здароўя. Гэта праграма будзе працягвацца. Доўг улады - зрабіць усё, каб медыцына ішла наперад.
Дзіяна Ткачэнка
