Прагаласаваць ідуць як маладыя людзі, так і старэйшае пакаленне.
Сям'я Ляўчук на выбарчы ўчастак прыйшла ў поўным складзе. Марына працуе юрысконсультам у Цэнтры па забеспячэнні дзейнасці бюджэтных арганізацый Капыльскага раёна, а Дзмітрый — машыністам халадзільных установак Капыльскага філіяла ААТ «Слуцкі сыраробны камбінат».
- У нашай краіне робіцца шмат для таго, каб забяспечыць жыллём маючых патрэбу: два гады таму мы атрымалі двухпакаёвую кватэру, пабудаваную з дзяржпадтрымкай, - дзеліцца Марына. - Мы хочам, каб нашы дзеці Аляксандр і Павел жылі ў мірнай і свабоднай краіне. Але галоўнае - адчувалі сябе бяспечна і былі ўпэўнены ў заўтрашнім дні.
Не першы год спраўна ўдзельнічае ў выбарчай кампаніі і Алена Садовік. Без малога 38 гадоў яна добрасумленна працавала настаўнікам біялогіі ў СШ № 3 г. Капыля, а цяпер, будучы на заслужаным адпачынку, — у Дактаровіцкай СШ настаўнікам біялогіі, медыцыны і геаграфіі. Менавіта ў СШ № 3 знаходзіцца яе выбарчы ўчастак для галасавання, куды яна прыйшла разам з малодшымі ўнучанькамі Кацярынай і Маргарытай.
— Я заўсёды ўдзельнічаю ў выбарчай кампаніі, — кажа Алена Мікалаеўна. - Мой голас - гэта наша будучыня, будучыня дзяцей і ўнукаў. За 30 гадоў, што жыву ў Капылі, я бачу добрыя, стабільныя і станоўчыя змены. Таму галасую за светлую і квітнеючую Беларусь!
Сваім канстытуцыйным правам скарысталася і памочнік выхавальніка ДУА «Яслі-сад № 3 г. Капыля» Наталля Ліннік. - На выбарчы ўчастак я прыйшла разам з дачкой Міланай — адзначыла Наталля Віктараўна. - Лічу, што ўдзел у выбарах - гэта не толькі наша права, але і грамадзянскі абавязак, які мы абавязаныя выканаць.
На ўчастку гучыць радыёканцэрт «Разам са сваёй сранай», разгорнута выстава вырабаў і кампазіцый «Свет прыгожага вакол нас», фотавыстава «Горад мой — любоў мая». Выбаршчыкі могуць таксама стаць актыўнымі ўдзельнікамі турніру па настольных гульнях і слухачамі канцэртнай праграмы «Мая Беларусь», падрыхтаванай навучэнцамі школы.
Набыць смачныя кандытарскія і гатовыя мясныя вырабы, свежую гародніну, напоі, гарачыя чай і каву і многае іншае можна ў буфеце крамы «Родны кут». Прадукцыя прапанавана пакупнікам па даступных цэнах.
Таццяна БОХАН
