На п'едэстале гонару капыляне - Арцём Холад (1 месца) і Ілля Матусевіч (3 месца) і іх трэнер Дзмітрый Була
Пазмагацца за перамогу сабралася шэсць каманд. Спартсмены спаборнічалі ў трох узроставых групах: старэйшая - 2003-2004 гадоў нараджэння, сярэдняя - 2005-2006 гадоў нараджэння і малодшая — 2007 года нараджэння і малодшай. У праграме спаборніцтваў - гонка класічным стылем на лыжаролерах, бег па перасечанай мясцовасці (крос) і змяшаная эстафета. У выніку каманда капылян заняла другое ганаровае месца, саступіўшы толькі тры ачкі спартсменам з Лагойскага раёна. Тройку лідараў замыкае каманда Барысаўскага раёна.
Падапечныя Таццяны Валер'еўны Грынкевіч і Дзмітрыя Міхайлавіча Була змагаліся да апошняга. У ліку наймацнейшых - Арцём Холад, які стаў пераможцам ва ўсіх трох заяўленых дысцыплінах. У асабістым заліку ў капылян таксама ёсць прызавыя месцы. У індывідуальных гонках класічным стылем на лыжаролерах нядрэнныя вынікі паказалі: сярод юнакоў - Аляксей Захарчэня (дыстанцыя 5 км) і Ілля Матусевіч (7,5 км), якія занялі другія месцы ў сваіх узроставых групах, сярод дзяўчат - Ганна Бурак і Таццяна Курчэўская, якія падзялілі другое і трэцяе месцы на дыстанцыі 5 км. Дарэчы, Ілья Матусевіч і Таццяна Курчэўская сталі бронзавымі прызёрамі ў кросе на дыстанцыі 5 і 3 км адпаведна.
- Гэтыя спаборніцтвы былі своеасаблівай стартавай пляцоўкай - адборам для пераможцаў і прызёраў — адзначыў дырэктар ДЮСШ Капыльскай РПА БПС работнікаў АПК Дзмітрый Була. - Свае сілу і цягавітасць спартсмены прадэманструюць у рэспубліканскай спартакіядзе сярод ДЮСШ па бегу на лыжаролерах і кросе, якая праходзіць з 9 па 13 верасня ў г.Гарадок Віцебскай вобласці. Копылянам - удачы!
Таццяна БОХАН
«СП»