Дадзеная пляцоўка бясплатна даступна для ўсіх жыхароў і гасцей горада.
З'яўленне падобнага аб'екта стала магчымым дзякуючы рэспубліканскаму буйнамаштабнаму сацыяльнаму праекту «Bonfesto – дзецям», які сумесна рэалізуюць Тураўскі малочны камбінат, Беларуская федэрацыя футбола і мясцовыя органы ўлады. Праект накіраваны на стварэнне і развіццё неабходнай інфраструктуры, якая спрыяе папулярызацыі спорту і здаровага ладу жыцця ў маладзёжным асяроддзі.
На цырымоніі адкрыцця прысутнічалі дырэктар Дэпартамента забеспячэння спартыўных мерапрыемстваў Асацыяцыі «Беларуская федэрацыя футбола» Іван Гаравец, брэнд-менеджэр ААТ «Тураўскі малочны камбінат» Кацярына Падгайская, намеснік старшыні Капыльскага райвыканкама Аляксандр Дубіна і начальнік упраўлення адукацыі, спорту і турызму райвыканкама Ірына Абас. Ганаровыя госці ўрачыстасці сімвалічна перарэзалі стужку і адправілі першы гол у вароты на новай спартыўнай пляцоўцы.
Пасля афіцыйнай часткі ацаніць якасць пляцоўкі змаглі навучэнцы ДУ «Капыльская СДЮШАР» падчас таварыскага матчу. Юныя футбалісты атрымалі ад ААТ «Тураўскі малочны камбінат» наборы свежых сыроў, а прадстаўнікі Беларускай федэрацыі футбола ўручылі дзецям памятныя падарункі.
У будаўніцтве новага аб'екта дапамогу аказваў філіял КУП «Мiнскаблдарбуд» — «ДРБУ № 124», упраўленне адукацыі, спорту і турызму і непасрэдна фізкультурна-аздараўленчы цэнтр. Каля месяца спатрэбілася, каб збудаваць пляцоўку і акультурыць прылеглую тэрыторыю.
Дарэчы, новае поле мае памер 20 на 40 метраў і абсталявана ўсімі неабходнымі атрыбутамі сучаснай футбольнай пляцоўкі ў адпаведнасці з еўрапейскімі патрабаваннямі: штучным пакрыццём, разметкай, варотамі і агароджай. У будучыні плануецца зрабіць у Капылі яшчэ адну падобную пляцоўку.
Павел Шэін