Работнікаў культуры павіншавалі намеснік старшыні Капыльскага райвыканкама Аляксандр Дубіна і галоўны спецыяліст аддзела ідэалагічнай работы, культуры і па справах моладзі райвыканкама Таццяна Віяленцій.
— Работнікі культуры - людзі творчыя, жыццярадасныя і непаўторныя, — адзначыў Аляксандр Анатольевіч. - Вы несяце ў наша жыццё творчасць і мастацтва, працуеце, ствараеце свята, калі ўсе адпачываюць. Хочацца пажадаць вам моцнага здароўя, невычэрпнай энергіі, крэатыўнасці, творчых вынікаў на карысць Капыльскага раёна.
Ганаровымі граматамі галоўнага ўпраўлення ідэалагічнай работы, культуры і па справах моладзі Мінаблвыканкама ўзнагароджаны настаўнік па класе скрыпкі Капыльскай дзіцячай школы мастацтваў Алена Валчкевіч і загадчык Грозаўскага СДК Яўгенiя Леус. Ганаровай граматай Капыльскага райвыканкама адзначана дырэктар РЦК Анастасія Курловіч, а падзякай старшыні Капыльскага райвыканкама - загадчык Цімкавіцкай сельскай бібліятэкай Вольга Радкевіч. Таксама самыя годныя прадстаўнікі сферы культуры былі адзначаны ганаровымі граматамі аддзела ідэалагічнай работы, культуры і па справах моладзі райвыканкама.
Музычныя віншаванні нашым работнікам культуры падарылі калегі-салісты «Вясёлага балагана» Старобінскага гарпасялковага дома культуры. Віноўнiкi ўрачыстасці са шчаслівымі ўсмешкамі на тварах адпачывалі і атрымлівалі асалоду ад таго, што адбываецца ў глядзельнай зале, адчуваючы сябе крыху незвычайна: бо гэта яны заўсёды дораць свята, а ва ўрачысты дзень свята і добры настрой падарылі ім.
Таццяна БОХАН
