Свае віншаванні мамам дораць і юныя карэспандэнты «Слава працы».
Аб сваіх мамах, іх занятках і густах распавядаюць пяцікласніцы з СШ № 3 г. Капыля, юнкоры «СП».
Маю любімую матулю завуць Таццяна. Яна працуе ў Дэпартаменце аховы Капыльскага раёна. Матуля мяне падтрымлівае, калі мне нялёгка. Памятаю адзін выпадак. Я тады павінна была выступаць на школьнай сцэне, чытаць верш. Я вельмі моцна хвалявалася. Хацела ўжо адмаўляцца ад выступу. А мама сказала: «Не перажывай. Усё атрымаецца». Я зрабіла, як яна сказала. І ў мяне ўсё атрымалася.
Дар'я Цішчанка
Маю маму завуць Анжэла, а на працы — Анжэла Мікалаеўна. Мама працуе настаўнікам-дэфектолагам у Дактаровіцкай СШ. Яна вучыць дзяцей правільна і прыгожа гаварыць. У школе маму паважаюць. Яна імкнецца заўсёды радаваць мяне прыемнымі падарункамі і дапамагае рабіць урокі. А ў выхадныя мы з ёй праводзім час на прыродзе, любім проста размаўляць.
Маргарыта Макаранка
У маёй мамы прыгожае імя - Рэгіна. А яшчэ ў мамы цікавая і важная прафесія - лекар. Калі я хварэю, мама заўсёды першая прыходзіць мне на дапамогу. Калі я была маленькай, мама чытала мне цікавыя кніжкі. Мама смачна гатуе. Яна - мой анёл-ахоўнік.
Алёна Ляцкая
Маю маму завуць Аксана. Яна працуе медыцынскай сястрой у раённай бальніцы. Мы з мамай любім разам глядзець фільмы, чытаць кнігі і дзяліцца ўражаннямі. Мама купляе мне прыгожую вопратку, робіць розныя прычоскі. Яна майстрыха.
Сафія Кароль
Завуць маю маму Наталля, яна працуе завучам у Капыльскім дзяржаўным каледжы. У яе складаная і цікавая праца. А яшчэ яна вельмі любіць святы, танцы, весялосць. Для мяне мама заўсёды будзе добрай феяй, якая заўсёды дапаможа і падтрымае.
Ліза Кудзелка
Мая мама Наталля працуе бухгалтарам. Яна вельмі акуратны і пунктуальны чалавек. Бо менавіта гэтыя якасці важны для бухгалтара. А дома яна самы пяшчотны, добры, незаменны чалавек. Часам мне нават здаецца, што мы з мамай аднагодкі.
Ліза Вішнеўская
