Пад такім лейтматывам прайшоў Мінскі абласны маладзёжны форум «Беларусь — гэта мы», які аб'яднаў больш за 800 маладых людзей з усяго сталічнага рэгіёна. Удзел у маштабным мерапрыемстве прынялі і прадстаўнікі Капыльшчыны.
На адкрыцці форуму ў Цэнтральным доме афіцэраў у Мінску выступіла член Савета Рэспублікі, старшыня Мінскага абласнога Савета дэпутатаў Наталля Якубіцкая:
- Такая пляцоўка - гэта магчымасць паказаць сябе, абмяняцца думкамі, абмеркаваць перспектывы развіцця сваёй сферы, раёна і краіны. Бо для нас, цяперашніх кіраўнікоў, ваша меркаванне вельмі каштоўна, таму што вам будаваць будучыню нашай маладой незалежнай дзяржавы, — звяртаючыся да моладзі, адзначыла Наталля Віктараўна.
Для ўдзельнікаў мерапрыемства была падрыхтавана насычаная праграма. Так, у рамках форуму працавалі секцыі па розных напрамках — «Сацыяльная сфера», «Сельская гаспадарка», «Эканоміка, прамысловасць, фінансы», «Будаўніцтва, транспарт, ЖКГ» — з удзелам прадстаўнікоў органаў дзяржаўнай улады. Моладзь Міншчыны наведала шэраг прадпрыемстваў і ўстаноў цэнтральнага рэгіёна. Сярод іх, напрыклад, такія значныя аб'екты, як індустрыяльны парк «Вялікі камень», СЗАТ «Белджы», ЗАТ «Штадлер Мінск», ААТ «Агракамбінат «Дзяржынскі», ГСУ «Барысаў-Арэна», УА «Барысаўскі дзяржаўны каледж», Нацыянальная бібліятэка Беларусі і іншыя.
Падчас наведвання ЗАТ «Штадлер Мінск»
Адной з галоўных падзей дня стаў адкрыты дыялог, які адбыўся ў Палацы культуры ім. М. Горкага ў г. Барысаве. На дыскусійнай пляцоўцы ў якасці экспертаў выступілі першы намеснік старшыні Мінаблвыканкама Сяргей Ляўковіч і першы сакратар ЦК ГА «БРСМ» Дзмітрый Варанюк, які зачытаў прывітальны адрас ад Прэзідэнта Рэспублікі Беларусь Аляксандра Лукашэнкі.
Дыялог прадстаўнікоў улады і ўдзельнікаў Форуму атрымаўся шчырым і канструктыўным. Моладзь Міншчыны цікавіла многае: як паўплываць на замацоўваемасць маладых кадраў у сельскай мясцовасці, як развівацца друкаваным СМІ разам з інтэрнэтам, ці давяраюць спікеры навінавым інтэрнэт-парталам, ці з'явяцца праграмы будаўніцтва жылля для работнікаў асобных бюджэтных сфер. Акрамя таго, абмеркавалі пытанні занятасці, сацыяльных праектаў і падтрымкі працадаўцамі маладых спецыялістаў. Пры гэтым кожнаму з прысутных была прадастаўлена магчымасць не проста падзяліцца сваімі ідэямі і бачаннем перспектыў, але і, па сутнасці, паўплываць на будучыню сваёй краіны.
Кульмінацыяй сустрэчы стаў урачысты канцэрт з удзелам артыстаў беларускай эстрады.
Члены дэлегацыі Капыльскага раёна - прадстаўнікі сельскагаспадарчай галіны Ніна Ярэменка і Анастасія Кеўра
Сваімі ўражаннямі ад маладзёжнага форуму «Беларусь - гэта мы» падзяліліся яго ўдзельнікі - прадстаўнікі Капыльскага раёна.
Настаўнік хіміі і біялогіі ДУА «Пацейкаўская сярэдняя школа» Анастасiя ЗБIРУХОВIЧ:
- Паездка пакінула вялікую колькасць пазітыўных эмоцый. Дзякуючы арганізаваным экскурсіям кожны з нас зможа укараніць у сваю дзейнасць нешта новае. Я, да прыкладу, наведала «Школу будучага» ў в. Копішча, дзе былі прадстаўлены найноўшыя распрацоўкі ў сферы педагогікі. Абавязкова падзялюся ўбачаным з калегамі. Што тычыцца дыялогу з прадстаўнікамі ўлады, то адназначна магу сказаць, што мы былі пачуты, спрабуючы данесці сутнасць асноўных праблем моладзі.
Эканаміст па працы ААТ «Семежава» Марыя Клімовіч:
- Уразіла неверагодна прыязная атмасфера, якая пануе тут, патрыятычны дух і выдатная арганізацыя форуму. Атрымалася пазнаёміцца са шматлікімі цікавымі людзьмі, знайсці аднадумцаў, а таксама ўсталяваць працоўныя кантакты для далейшага супрацоўніцтва. Рады, што можна было задаваць пытанні і атрымліваць на іх шчырыя адказы. Як аказалася, моладзь у нас вельмі ініцыятыўная. Самае галоўнае, каб гэтыя ініцыятывы апынуліся стваральнымі і канструктыўнымі.
Намеснік начальніка аддзела ЖКГ, архітэктуры і будаўніцтва Капыльскага райвыканкама Алеся Атрашкевіч:
- Асабліва парадавала тое, што ў маршрут маёй групы сярод іншых аб'ектаў уваходзіў індустрыяльны парк «Вялікі камень», куды я даўно хацела патрапіць. Яркія ўражанні пакінуў таксама адкрыты дыялог. Спадабалася тое, што прадстаўнікоў улады сапраўды хвалююць праблемы моладзі і нам гатовы дапамагаць. Характэрна, што нягледзячы на тое, што пытанні задавалі прадстаўнікі розных раёнаў, актуальны яны для ўсіх, у тым ліку і для моладзі Капыльшчыны.
Аксана МІХАЙЛОЎСКАЯ
