Тут можна было пакаштаваць розныя стравы з бульбы, убачыць вырабы з яе, а таксама скульптуры, выставы і многае іншае.
Старшыня раённага Савета дэпутатаў Ірына Кісляк, першы намеснік старшыні райвыканкама Віталь Ракевіч, намеснікі старшыні Аляксандр Дубіна, Святлана Лосік, першы сакратар РК ГА «БРСМ» Вольга Сцяпанава, а таксама іншыя прадстаўнікі райвыканкама ацанілі арганізацыю Бульба-фэста. Падчас адкрыцця мерапрыемства Ірына Кісляк павітала ўсіх прысутных на свяце і пажадала выдатнага настрою.
Менавіта такі настрой і стаў выдатнай падставай зазірнуць на ўрачыстасць - работнікі культуры раёна не давалі сумаваць сваімі песнямі і танцамі. Каля раённага цэнтра культуры разгарнулася фотагалерэя, дзе героем была прадстаўлена Бульба. Побач можна было ўбачыць разнастайныя карціны і скульптуры — і тут жа галоўны элемент творчасці — бульба. Працавалі забаўляльныя пляцоўкі, пункты грамадскага харчавання, гандлю, была арганізавана выстава літаратуры «Ах, бульбачка, бульбачка», віктарына «Барыня-бульбачка», акцыя «Кнігу чытаеш — ніколі не галадаеш».
Незабыўныя ўражанні ў гасцей свята пакінулі і падворкі прадпрыемстваў, арганізацый і ўстаноў раёна, выстаўленыя на плошчы — кожнаму было што паказаць і чым здзівіць. Мноства розных страў з выкарыстаннем асноўнага інгрэдыента не пакінулі абыякавым і галодным нікога.
Працы ўсіх удзельнікаў свята не засталіся незаўважанымі. Члены журы - начальнік аддзела эканомікі райвыканкама Ірына Пабока, старшыня Капыльскай РА Беларускага прафесійнага саюза работнікаў адукацыі і навукі Марына Крэпская і галоўны бухгалтар райкама прафсаюза работнікаў АПК Вікторыя Саматыя ўручылі падарункі і сертыфікаты лепшым канкурсантам у сваіх намінацыях.
Па выніках фотаконкурсу «Эх, бульбачка, бульба» перамог дашкольны цэнтр развіцця дзіцяці «Сонейка», другім стаў калектыў раённай цэнтральнай бібліятэкі ім. Анатоля Астрэйкі, у гімназіі № 1 - трэцяе месца.
У конкурсе «Лепшая скульптура з бульбы» першае месца прысудзілі ААТ «Праснакі», на другім месцы — ААТ «Скабін», у тройцы пераможцаў — КСУП «Дактаровічы».
За перамогу ў конкурсе «Лепшае пано з бульбы» павіншавалі калектыў СШ № 2, «срэбра» - у РСУ, Капыльскі дзяржаўны каледж заняў трэцяе месца.
У намінацыях «Лепшы падворак» і «Лепшы дэгустацыйны столік» першымі сталі работнікі ААТ «Семежава», другое месца — у дапаможнай школы-інтэрнат, трэцяе месца дасталося калектыву ААТ «Ціміразеўскі».
Варта адзначыць, што Бульба-фэст з часам стаў адной з самых чаканых падзей у Капылі: кожны год удзельнікаў і гасцей на свяце становіцца ўсё больш і больш.
Павел Шэін
