Група навучэнцаў гарадской сярэдняй школы № 2 ачысціла тэрыторыю ад апалай лістоты і сухастою, сабралі смецце, прапалола і прывяла ў парадак клумбу з кветкамі.
- Рэспубліканская дабрачынная акцыя рэалізуецца з мэтай выхавання і развіцця ў падрастаючага пакалення духоўна-маральных каштоўнасцяў, заснаваных на традыцыях беларускага народа, шырокага ўключэння маладых людзей у працэс працоўнай дзейнасці, накіраваны на добраўпарадкаванне і аднаўленне культавых аб'ектаў, — распавядае першы сакратар РК ГА «БРСМ» Вольга Сцяпанава. - Абласны этап акцыі пройдзе ў Нясвіжы. Прадстаўнікі раённых камітэтаў ГА «БРСМ» добраўпарадкавалі тэрыторыю царквы Святога Георгія Перамаганосца.
Ксёндз Андрэй Калядка гутарыць з навучэнцамі
- Вельмі прыемна, што ў гэту акцыю актыўна ўключаецца моладзь, якая разумее неабходнасць адраджэння і захавання для іншых пакаленняў святынь, — адзначыў ксёндз касцёла святых Пятра і Паўла Андрэй Калядка. - Хлопцы асабістым прыкладам паказваюць, што праца дапамагае чалавеку ўсвядоміць сэнс нашага жыцця. У далейшым таксама будзем супрацоўнічаць з моладдзю.
Навучэнцы СШ № 2 г. Капыля ўпэўнены, што ўдзел у падобных акцыях дапамагае не толькі прывесці ў парадак рэлігійныя месцы, але гэта яшчэ добрая нагода здзяйсняць добрыя справы. У знак падзякі хлопцам ксёндз Андрэй правёў займальную экскурсію па касцёле.