Дыялог з моладдзю ў рэжыме анлайн вядзе Ірына Кісляк
Аляксандр Дубіна
Вольга Сцяпанава
Адкрыты дыялог моладзі з прадстаўнікамі ўлады – звыклы фармат. Тэма маладзёжнай палітыкі, як паказала анлайнавая дыялогавая пляцоўка, вызначыла жывы інтарэс і сур'ёзную ініцыятыўнасць удзельнікаў. Юныя парламентарыі абмяняліся вопытам, павысілі веды і кампетэнцыі ў рэалізацыі маладзёжнай палітыкі, а таксама абмеркавалі лідэрскія якасці, якімі павінен валодаць член маладзёжнага парламента.
Члены Маладзёжнага парламента Анастасія Карповіч і Ганна Матусевіч абмяркоўваюць планы на будучыню з юнымі парламентарыямі
Праінфармаваўшы прысутных аб планах Маладзёжнага парламента на будучы год, спікеры адказалі на пытанні, якія паступалі ад маладых людзей. У заключэнне юным парламентарыям было зададзена хатняе заданне: стварыць відэаролік «Адзін дзень з жыцця Маладзёжнага парламента». Абавязковая ўмова - падысці да яго крэатыўна. Вынікам праведзенай працы стане стварэнне агульнага роліка маладых парламентарыяў Капыльшчыны з наступным яго размяшчэннем у сацыяльных сетках.
Як падкрэсліла падчас мерапрыемства першы сакратар Капыльскага РК ГА «БРСМ» Вольга Сцяпанава, правядзенне семінара - гэта магчымасць далучэння моладзі да парламенцкай дзейнасці, павышэнне яе прававой культуры, фарміраванне пераемнасці пакаленняў, стварэнне ўмоў для дыялогу, супрацоўніцтва і абмену вопытам паміж прадстаўнікамі розных пакаленняў.
Сваімі ўражаннямі падзялілася навучэнка гімназіі № 1 г. Капыля Ганна Матусевіч:
- Навучальны семінар для маладых парламентарыяў з'яўляецца выдатным урокам для нас, будучыні краіны. Прадстаўнікі ўлады распавядаюць і дапаўняюць нашы веды, даюць новыя даручэнні, жадаюць, каб наша дзейнасць была больш актыўнай. Зручны і фармат семінара: з дапамогай відэаканферэнцыі мы змаглі абмеркаваць маладзёжныя пытанні і прапановы з большасцю ўдзельнікаў. Усе пачулі сваё хатняе заданне, планы на будучы год, а таксама па навучанні дзейнасці Маладзёжнага парламента. Мы хочам удзельнічаць у жыцці свайго горада і сваёй актыўнай жыццёвай пазіцыяй стараемся даказаць моладзі, што мы - сапраўдныя лідэры і прыклад для пераймання. Спадзяюся, што ў нас яшчэ будуць такія семінары. Я рада, што з'яўляюся дэпутатам Маладзёжнага парламента.
Таццяна БОХАН