Святлана Васільеўна, г. Капыль
Каментуе начальнік Капыльскага РАСК Алег Бабарэка:
- Хочаце стаць следчым? Тады вам у Акадэмію МУС: Упраўленне Следчага камітэта Рэспублікі Беларусь па Мінскай вобласці праводзіць адбор кандыдатаў для паступлення на следча-экспертны факультэт Акадэміі МУС Рэспублікі Беларусь. Кандыдатамі могуць стаць выпускнікі агульнаадукацыйных школ раёна.
На факультэце ажыццяўляецца навучанне па спецыяльнасці «Правазнаўства» з наступным прысваеннем кваліфікацыі «Юрыст» і спецыяльнага звання «Лейтэнант юстыцыі». Тэрмін навучання складае 4 гады. На перыяд навучання курсанты забяспечваюцца пражываннем, харчаваннем, форменным абмундзіраваннем і грашовым забеспячэннем.
Каб стаць курсантам Акадэміі МУС і ў далейшым праходзіць службу ў падраздзяленнях Следчага камітэта Рэспублікі Беларусь, неабходна да 1 красавіка 2021 года асабіста звярнуцца ў Капыльскі раённы аддзел Следчага камітэта Рэспублікі Беларусь для праходжання гутаркі з начальнікам падраздзялення і атрымання даведкі-рэкамендацыі для паступлення на следча-экспертны факультэт. Пасля трэба прайсці прафесійны адбор, прадугледжаны для абітурыентаў, якія паступаюць на следча-экспертны факультэт, а таксама прыняць удзел у конкурсе на паступленне па выніках цэнтралізаванага тэсціравання па прадметах: руская альбо беларуская мова, замежная мова і грамадазнаўства.
Больш падрабязную інфармацыю можна атрымаць у раённым аддзеле Следчага камітэта па адрасе: г. Капыль, вул. Максіма Горкага, 54 альбо па тэлефоне 50-2-26. Будзем рады бачыць вас!
Падрыхтавала Таццяна БОХАН
Крыніца http://www.kopyl.by
