Дыпломам у намінацыі «Паспяховы кіраўнік» узнагароджана ўрач-інфекцыяніст (загадчык) інфекцыйнага аддзялення Капыльскай цэнтральнай раённай бальніцы Валянціна Козел.
За званне лепшых у медыцыне, прамысловасці, сельскай гаспадарцы, выхаванні дзяцей і адукацыі змагаліся некалькі сотняў чалавек. Лепшыя прадстаўніцы прыгожага полу былі адзначаны дыпломамі ў шасці намінацыях і ў кожнай вызначаны пераможцы.
Гісторыя Валянціны Козел - прыклад актыўнай жыццёвай пазіцыі, мэтанакіраванасці, працавітасці. Сапраўдны прафесіянал сваёй справы, якой аддала больш за 36 гадоў. Студэнтка Гродзенскага дзяржаўнага медыцынскага ўніверсітэта шлях у медыцыну пачала з урача-інтэрна па педыятрыі Маладзечанскай гарадской дзіцячай бальніцы. Затым больш за 20 гадоў адпрацавала лекарам-педыятрам у Капыльскай ЦРБ. І вось ужо 14-ы год працуе ў інфекцыйным аддзяленні. Лекар пераканана, што калі любіш сваю справу, то поспех гарантаваны. Па яе словах, у ўзначаленым ёю аддзяленні працуе выдатная каманда аднадумцаў, выбар якіх – дапамагаць людзям.
Старшыня Капыльскай РА ГА «БСЖ» Святлана Маліноўская з членамі дэлегацыі
- Без калектыву нічога б не атрымалася – мяркуе Валянціна Веньямінаўна. - Гэта прызнанне маёй працы і ўсіх маіх калег, для якіх прафесіяналізм азначае ўзаемадавер, узаемапавагу і ўменне адчуваць пакуты іншых.
Такому жыццёваму і прафесійнаму прынцыпу яна застаецца верная ўсё сваё жыццё. За міласэрнасць, чуласць і чалавекалюбства яе паважаюць усе, хто калісці з ёй разам працаваў і цяпер працуе ў адным калектыве, ёй удзячны пацыенты.
Таццяна БОХАН
Крыніца http://www.kopyl.by