У гэтым былі перакананы ўдзельнікі пашыранага пасяджэння Прэзідыума Капыльскага раённага Савета ветэранаў, якое нядаўна прайшло на базе Капыльскай раённай цэнтральнай бібліятэкі ім. А. Астрэйка.
У сустрэчы прынялі ўдзел старшыня раённага Савета ветэранаў Людміла Каменка, галоўны спецыяліст аддзела ідэалагічнай работы, культуры і па справах моладзі райвыканкама Таццяна Віяленцій, старшыні і члены першасных ветэранскіх арганізацый горада і раёна. На мерапрыемстве таксама прысутнічала запрошаная госця - дэлегат VI Усебеларускага народнага сходу, культарганізатар Лотвінскага цэнтра аматарскай творчасці Капыльскага раённага цэнтра культуры Галіна Дрожжа. У рамках пасяджэння Галіна Віктараўна правяла дыялогавую пляцоўку «Сіла дзяржавы ў адзінстве», падчас якой адказала на пытанні і падзялілася сваімі эмоцыямі ад маштабнага форуму.
- Для мяне паездка была вельмі хвалюючай і адказнай, - адзначыла дэлегат. - Хоць мы, прадстаўнікі сферы культуры, шмат дзе бываем, маем зносіны з рознымі людзьмі, але на мерапрыемстве такога ўзроўню раней прысутнічаць не даводзілася. Добразычліва настроеная публіка, падтрымка і яднанне - вось што адчувалася падчас сходу. Галоўны ж пасыл народнага веча можна пазначыць так: усё для народа, усё для чалавека.
Дарэчы, Галіна Віктараўна на сустрэчу прыбыла не адна, а з калегамі-удзельнікамі аматарскага аб'яднання «Лоцвінскія ўдалухі», якія выканалі для прысутных музычныя, паэтычныя і гумарыстычныя нумары.
Што тычыцца афіцыйнай часткі пасяджэння, то яе прысвяцілі разгляду бягучых момантаў працы раённага Савета ветэранаў. На парадку дня значылася таксама зацвярджэнне Палажэння аб арганізацыі і правядзенні агляду-конкурсу «Ветэранскае падвор'е» ў 2021 годзе. Асаблівая ўвага пры гэтым была нададзена намінацыі «Добраўпарадкаванне жывёлагадоўчых ферм і комплексаў». Абмеркавалі будучы ўдзел у рэспубліканскім вакальным конкурсе сярод ветэранаў «Песні Перамогі», а таксама нюансы падрыхтоўкі да конкурсу дзіцячага малюнка «Нам свет завешчана берагчы».
Паколькі сустрэча прайшла напярэдадні 8 сакавіка, у яе завяршэннi для жанчын быў падрыхтаваны музычны падарунак - Анастасія Карповіч выканала песні пад гітару.
- Сёння ў раёне пражывае больш за 7000 людзей пенсійнага ўзросту, і многія з іх - члены ветэранскіх арганізацый — патлумачыла ў інтэрв'ю Людміла Каменка. - Нават у гэтай эпідсітуацыі мы не стаім на месцы — стараемся развівацца, нешта робім, у тым ліку і ў анлайн-рэжыме. Словам, ідзем у нагу з часам, захоўваем актыўную жыццёвую пазіцыю, а галоўнае — не старэем душою. Пераканана, што і ў няпростых умовах, звязаных з распаўсюджваннем каранавіруса, трэба мець зносіны, у тым ліку для таго, каб заставацца палітычна адукаванымі. Дарэчы, актывісты нашай арганізацыі ўважліва сочаць за падзеямі ў краіне, знаёмы яны і з вынікамі VI Усебеларускага народнага сходу. Асабіста я цалкам згодна з усім сказаным на гэтым форуме, і ў першую чаргу з тым, што самае галоўнае для кожнага з нас — захаваць мір і стабільнасць у Беларусі. Як паказала сённяшняя сустрэча, нашы ветэраны з гэтым таксама салідарны.
Людміла Камёнка (злева) з удзельнікамі пасяджэння
Аксана Міхайлоўская
Крыніца http://www.kopyl.by
