Звяртаючыся да прысутных, кіраўнік раёна адзначыў:
— Прыемна, што ў шэрагі беларускіх грамадзян уліваюцца граматныя і адукаваныя, таленавітыя і працавітыя маладыя людзі, годна прадстаўляючыя моладзь Капыльшчыны. З гонарам нясіце высокае званне грамадзяніна.
Цырымонію ўручэння пашпартоў правялі Сяргей Пілішчык і Ірына Кісляк (злева)
Віншуючы юных капылян з уступленнем у дарослае жыццё, старшыня райсавета ветэранаў Людміла Каменка пажадала ім выканаць усе свае мары і знайсці свой шлях у жыцці:
- Ідзіце смела на ўсе добрыя справы і вядзіце за сабой іншых. А самае галоўнае - ніколі не заставайцеся абыякавымі, заўсёды будзьце годнымі грамадзянамі сваёй краіны.
Навучэнцы гарадскіх школ Яна Гараховік, Вольга Скуратовіч і Дар'я Лабацэвіч рады ўручэнню пашпартоў
Пажаданне маладым людзям прагучала таксама і ад прадстаўнікоў Беларускай рэспубліканскай піянерскай арганізацыі. З словам у адказ пасля цырымоніі ўручэння пашпартоў ад моладзі выступіла навучэнка СШ № 2 г. Капыля, пераможца першага этапу рэспубліканскай алімпіяды па вучэбных прадметах «Руская мова», «Руская літаратура», «Матэматыка», «Геаграфія», актыўны член валанцёрскага атрада «Міласэрнасць», пераможца раённага конкурсу агітбрыгад па здаровым ладзе жыцця Ульяна Дубовік:
- Мы, юнакі і дзяўчаты 14 гадоў, абяцаем, што будзем добра вучыцца, прымаць актыўны ўдзел у творчых і інтэлектуальных конкурсах, у спартыўных спаборніцтвах. Каб кожны з нас мог з упэўненасцю сказаць, што беларуская моладзь - гэта паўнапраўныя грамадзяне Рэспублікі Беларусь.
Разам з пашпартам грамадзяніна Рэспублікі Беларусь усе ўдзельнікі цырымоніі атрымалі памятныя сувеніры і падарункавае камплектнае выданне «Я — грамадзянін Рэспублікі Беларусь». Кніга раскажа маладому пакаленню, якімі правамі яно валодае, якія законы павінна шанаваць, якія ідэалы і каштоўнасці сваёй Радзімы свята берагчы.
Заключным акордам мерапрыемства стала прыняцце прысягі маладога грамадзяніна Рэспублікі Беларусь.
Пасля хвалюючай падзеі пагутарылі з удзельнікамі ўрачыстасці, якія падзяліліся сваімі ўражаннямі.
Яна Гараховік, навучэнка СШ № 3 г. Капыля, актыўная ўдзельніца мастацкай самадзейнасці, вядучая ўсіх школьных мерапрыемстваў:
- Вядома, гэты дзень запомніцца і мне, і астатнім дзецям на ўсё жыццё. Будучыня - за маладымі, а мы поўныя энергіі, канструктыўных ідэй і смелых рашэнняў.
Вольга Скуратовіч, навучэнка СШ № 2 г. Капыля, выдатніца вучобы, пераможца першага этапу рэспубліканскай алімпіяды па вучэбным прадмеце «Геаграфія», удзельніца першага этапу рэспубліканскай алімпіяды па вучэбным прадмеце «Гісторыя»:
- Атрыманне першага ў маім жыцці дакумента - ганарова і вельмі хвалююча для мяне. Ганаруся, што мяне, як і маіх аднакласнікаў, запрасілі на такое адказнае мерапрыемства.
Дар'я Лабацэвіч, навучэнка гімназіі № 1 г. Капыля, выдатна займаецца ў школе, з вялізным задавальненнем прымае ўдзел у жыцці класа:
- Я вельмі рада, што сёння ва ўрачыстай абстаноўцы атрымала пашпарт. Гэта першы крок у дарослае жыццё. Цяпер мы сталі не толькі сапраўднымі грамадзянамі Рэспублікі Беларусь, але і паспяхова працягнем справы і пачаткі людзей старэйшых пакаленняў, якія стваралі і развівалі нашу краіну.
Таццяна БОХАН
Крыніца http://www.kopyl.by
