У гэты дзень у 1996 годзе Аляксандр Лукашэнка і Барыс Ельцын падпісалі ў Маскве Дагавор аб стварэнні Супольнасці Беларусі і Расіі. Факт падпісання паклаў пачатак працэсу ўзаемнай інтэграцыі краін і стаў сімвалам блізкасці брацкіх народаў. Менавіта з гэтай знамянальнай даты, па сутнасці, пачалася мэтанакіраваная работа па будаўніцтве Саюзнай дзяржавы.
У рамках праекта з навучэнцамі СШ № 3 г. Капыля сустрэлася старшыня раённага Савета дэпутатаў Ірына Кісляк. Мерапрыемства прайшло ў сяброўскай і нязмушанай атмасферы. Ірына Мікалаеўна, без сумневу, змагла зацікавіць хлопцаў тэматыкай «ШАГа». І гэта нядзіўна: па родзе сваёй дзейнасці яна часцяком сутыкаецца з пытаннямі па дадзеным кірунку і добра імі валодае. Больш за тое, Ірыне Мікалаеўне як прадстаўніку раённай улады не раз даводзілася прымаць гасцей з гарадоў-пабрацімаў, а таксама наведваць іх у складзе дэлегацый ад нашага рэгіёну.
Ірына Кісляк (у цэнтры) гутарыць са школьнікамі
Як патлумачыла школьнікам госця, у Капыльскага раёна заключаны дагаворы аб супрацоўніцтве з г.Чэхавым Маскоўскай вобласці, Арэнбургскім раёнам Арэнбургскай вобласці і Мацвеева-Курганскім раёнам Растоўскай вобласці. Іх прадстаўнікі не раз аказваліся ў ліку запрошаных на нашы святы. З удзелам ганаровых гасцей плануецца правесці і будучую знамянальную падзею — Дзень беларускай пісьменнасці. Добрай традыцыяй таксама стала выступленне творчых калектываў з гарадоў раёнаў-пабрацімаў на розных мерапрыемствах, якія праходзяць у Капылі. Хлопцам было цікава даведацца і аб вопыце аказання дапамогі іх аднагодкамі адной з расійскіх устаноў адукацыі. Так, Чарнарэчанская школа Арэнбургскага раёна звярнулася з просьбай аб садзейнічанні ў пошуку сваіх землякоў-воінаў, якія загінулі на тэрыторыі Беларусі ў гады Вялікай Айчыннай вайны. У сувязі з гэтым у мінулым годзе навучэнцамі Капыльшчыны — членамі Маладзёжнага парламента — была праведзена вялікая і пры гэтым плённая пошукавая праца, у выніку якой у гісторыі стала менш «прабелаў».
Словам, узаемаадносіны з краінай-суседкай падтрымліваюцца нават на такім, мясцовым, узроўні - не кажучы аб маштабах дзяржавы. Вядзецца далейшая планамерная праца па ўмацаванні супрацоўніцтва. І тут, як і ва ўсталяванні сяброўскіх адносін паміж людзьмі, важны кожны крок.
- Думаю, што такая цесная сувязь не перапыніцца ніколі, — рэзюмавала Ірына Кісляк. — У нашых народаў падобныя і культура, і менталітэт, і традыцыі. А гэта, у сваю чаргу, паслужыць трывалай асновай для развіцця Саюзнай дзяржавы.
Аксана Міхайлоўская
Крыніца http://www.kopyl.by