Як растлумачыў начальнік Капыльскага РАУС Рыгор Рабцаў, такія комплексныя праверкі штогод праходзяць для таго, каб забяспечыць якаснае правядзенне пасяўной, нарыхтоўчай і ўборачнай кампаній, прадухіліць злачынныя замахі на таварна-матэрыяльныя каштоўнасці сельскагаспадарчых арганізацый. Акрамя таго, падобныя мерапрыемствы дазваляюць выявіць факты безгаспадарчасці і бяздзейнасці службовых асоб, у тым ліку звязаныя з неналежным станам сельскагаспадарчай тэхнікі.
Рабочая група на чале з начальнікам Капыльскага РАУС Рыгорам Рабцавым (другі справа) аглядае мехдвор ААТ «Скабін»
- У склад рабочых груп, якія кантралююць стан і гатоўнасць сельгастэхнікі, уваходзяць супрацоўнікі Дзяржаўтаінспекцыі, групы па барацьбе з эканамічнымі злачынствамі і аддзела аховы правапарадку і прафілактыкі, таксама прыцягваюцца і прадстаўнікі ўпраўлення сельскай гаспадаркі Капыльскага райвыканкама, — адзначыў Рыгор Аляксеевіч. - У перыяд рэалізацыі мерапрыемстваў супрацоўнікі міліцыі асаблівую ўвагу звяртаюць на арганізацыю вартавой аховы, стан замыкальных прылад, забеспячэнне неабходнага асвятлення тэрыторый. Прадстаўнікамі ДАІ асноўны ўпор робіцца на кантролі парадку перадрэйсавага агляду вадзіцеляў і своечасовасці праходжання тэхнічнага агляду транспартных сродкаў. Па выніках маніторынгу пры выяўленні парушэнняў будуць вынесены прадпісанні аб іх ліквідацыі. У выпадку невыканання ў тэрмін прадпісання вінаватых службовых асоб у адпаведнасці з дзеючым заканадаўствам прыцягнуць да адміністрацыйнай адказнасці.
Аксана Міхайлоўская
Крыніца http://www.kopyl.by