Аўтапрабег пачаўся з міні-канцэрта, які даў для навучэнцаў і педагогаў Слабадакучынскай СШ член раённай арганізацыі ГА «Беларускі саюз афіцэраў» старшы лейтэнант запасу Антон Шышмароў. Акрамя таго, прысутныя азнаёміліся з выставай плакатаў, фатаграфій і кніг, якую падрыхтавала загадчыца бібліятэкі-клуба Валянціна Барташэвіч.
Першым пунктам маршруту сталі могілкі вёскі Слабада-Кучынка, дзе пахаваны воіны 10-й арміі, якія далі першы бой гітлераўцам на тэрыторыі Капыльскага раёна 29 чэрвеня 1941 года. Там прайшоў мітынг-рэквіем. Сімвалічна, што першы вянок да помніка ўсклалі члены БРСМ Вікторыя Сіманава і Кацярына Быкава - ураджэнкі Украіны, бо сярод пахаваных чырвонаармейцаў былі воіны з Адэскай вобласці. Затым былі наведаны памятныя месцы ў вёсках Астрэйкі, Харытонаўка, Роспы, Старыца і Свідзічы, дзе ў знак падзякі за мірнае жыццё да помнікаў і абеліскаў ускладаліся вянкі і кветкі, аб'яўлялася хвіліна маўчання.
Апошнім пунктам маршруту стаў помнік мірным жыхарам вёскі Свідзічы, у якога адзіны сведка ваеннай пары Святлана Іванаўна Астрэйка падзякавала маладому пакаленню за захаванне памяці аб усіх тых, хто набліжаў перамогу.
Барыс ДЗЯНЮСЮК,
намеснік старшыні Савета раённай арганізацыі ГА «Беларускі саюз афіцэраў»
Крыніца http://www.kopyl.by
