Старт святочным мерапрыемствам быў дадзены ля помніка воінам-вызваліцелям у райцэнтры. Там адбыўся мітынг з удзелам прадстаўнікоў раённай улады, працоўных калектываў, грамадскіх арганізацый, а таксама жыхароў і гасцей горада. Традыцыйна ў гэты дзень асаблівая ўвага была нададзена яшчэ адной знамянальнай даце - Дню Дзяржаўнага герба Рэспублікі Беларусь і Дзяржаўнага сцяга Рэспублікі Беларусь.
На мерапрыемстве з прывітальным словам выступілі старшыня раённага Савета дэпутатаў Ірына Кісляк, старшыня райвыканкама Сяргей Пілішчык, былая малалетняя вязніца Кацярына Дзятловіч, навучэнка гімназіі № 1 г. Капыля, сябра маладзёжнага парламента, актывіст БРСМ Ганна Матусевіч, начальнік адасобленай групы Капыльскага раёна ваеннага камісарыята Нясвіжскага і Капыльскага раёнаў Сяргей Маргалік.
Прысутныя ўшанавалі памяць загінуўшых хвілінай маўчання, усклалі вянкі і жывыя кветкі да помніка. У гонар загінуўшых прагучаў урачысты залп вайскоўцаў.
Народныя гулянні працягнуцца ў зоне адпачынку.
Напярэдадні 9 Мая прадстаўнікі грамадскіх арганізацый і працоўных калектываў усклалі вянкі і жывыя кветкі да помнікаў. Так, старшыня раённага Савета ветэранаў Людміла Каменка, намеснік начальніка аддзела ідэалагічнай работы, культуры і па справах моладзі райвыканкама Наталля Гарбацэвіч і старшыня РОС «ДТСААФ» Аляксандр Касінскі наведалі некалькі памятных месцаў.
Яны ўсклалі кветкі і ўшанавалі памяць загінуўшых хвілінай маўчання ля помніка жыхарам Капыля, якія загінулі ў гады нямецка-фашысцкай акупацыі, размешчаным у парку каля дзіцячай школы мастацтваў, а таксама ля памятнага знака ў Цэнтральным парку, дзе 22 ліпеня 1942 года былі закатаваны вязні яўрэйскага гета.
Наведалі ў гэты дзень і абеліск ахвярам нацызму, размешчаны на ўскраіне зоны адпачынку - там у 1942 годзе былі па-зверску забіты 2965 яўрэяў Капыльскага гета. Вянок быў ускладзены таксама да мемарыяла на алеі мужнасці і адвагі.
Аксана Міхайлоўская
Крыніца http://www.kopyl.by
