Неабходнасць у будынку наспела даўно. Больш за 40 гадоў пракуратура размяшчалася на тэрыторыі суда. Не адно пакаленне пракурорскіх работнікаў прайшлі сваё станаўленне ў яго сценах. У мінулым годзе прыступілі да рэалізацыі праекта. І вось доўгачаканы момант наступіў.
- Сёння мы адкрываем сучасны будынак пракуратуры. Гэта важная падзея для нашых органаў. Вы набылі новы дом, у якім будзіце адстойваць інтарэсы грамадзян — адзначыў генеральны пракурор Андрэй Швед, звяртаючыся да супрацоўнікаў пракуратуры Капыльскага раёна і гасцей свята. - Вялікую частку часу мы праводзім у зносінах з людзьмі. Спрабуем дапамагчы, у тым ліку, і зразумець, што ёсць закон і ён на іх баку. Вельмі важна, каб супрацоўнікі пракуратуры былі адданы дзяржаве, прысязе, абавязку, умелі прымаць правільныя рашэнні і здзяйсняць правільныя ўчынкі. На вас глядзяць заўсёды, калі вы на працы, дома, на адпачынку. Насіце з гонарам пагоны.
Андрэй Іванавіч асабліва падкрэсліў, што на Міншчыне ўсе пытанні вырашаюцца канструктыўна і па справе. За актыўнае ўзаемадзеянне з органамі пракуратуры, аказанне дапамогі ў набыцці будынка, паспяховае выкананне будаўніча-мантажных работ Генеральны пракурор узнагародзіў Ганаровымі граматамі старшыню Мінабаівыканкама Аляксандра Турчына і старшыню Капыльскага райвыканкама Сяргея Пілішчыка. Падзякай адзначаны кіраўнік спраў райвыканкама Алена Міхайлоўская і дырэктар ГП «Капыльскі рамонтна-будаўнічы ўчастак» Яўген Лепяцiла.
- Адкрыццё любога аб'екта гэта практычнае ўвасабленне ў жыццё кіраўніцкіх рашэнняў. Год таму мы прынялі правільнае рашэнне. Будынак пракуратуры - першы крок у чарадзе радасных падзей перад надыходзячымі на Капыльшчыне святамі: Днём беларускага пісьменства і абласнымі Дажынкамі. Да верасня Капыль зайграе новымі фарбамі і ў жыхароў знікнуць шматлікія праблемы — адзначыў Аляксандр Турчын.
Губернатар падкрэсліў, што пракуратура — адмысловы орган. Падзеі мінулага года паказалі ўсім, як важна быць згуртаванымі і выконваць сваю працу правільна.
- Сённяшні будынак - не апошні для пракуратуры Мiнскай вобласці — запэўніў Аляксандр Генрыхавіч і ўручыў раённай пракуратуры падарунак - ноўтбук.
— Наш будынак пракуратуры знаходзіцца на ўездзе ў горад і ён стане сімвалам таго, што на тэрыторыі раёна шануюць закон і паважаюць правы людзей, — адзначыў пракурор Капыльскага раёна Арцём Ляўшун.
Пасля цырымоніі ўручэння сімвалічнага ключа і перарэзання чырвонай стужкі дзверы пракуратуры расчыніліся для першых гасцей.
Будынак сучасны, тут створаны ўсе ўмовы для эфектыўнай дзейнасці работнікаў пракуратуры. Паклапаціліся і аб наведвальніках. Маецца асобнае памяшканне для прыёму грамадзян, на інфармацыйных стэндах размешчана інфармацыя, неабходная для падачы зваротаў.
У новым будынку работнікі пракуратуры працягнуць забяспечваць абарону правоў і законных інтарэсаў грамадзян, арганізацый, грамадскіх і дзяржаўных інтарэсаў.
Крыніца http://minsk-region.gov.by
