Так, з віншаваннямі і падарункамі да дзяцей прыйшлі прадстаўнікі Белдзяржстраха. Начальнік аддзела медыцынскага страхавання філіяла Белдзяржстраха па Мінскай вобласці Наталля Бондар, дырэктар прадстаўніцтва Белдзяржстраха па Капыльскім раёне Мікалай Місючэнка і яго намеснік Аляксандр Васілевіч уручылі дырэктару школы-інтэрната сертыфікат на суму 4000 рублёў, а кожнаму з выхаванцаў індывідуальны падарунак — заплечнік з канцылярскімі прыладамі. Дарэчы, напярэдадні свята Мікалай Уладзіміравіч і Аляксандр Валянцінавіч пабывалі яшчэ і ў сацыяльна-педагагічным цэнтры Капыльскага раёна. І таксама не з пустымі рукамі - перадалі канцтавары і сертыфікат на суму 7000 рублёў.
- Наша арганізацыя цягам некалькіх апошніх гадоў праводзіць рэспубліканскую акцыю «Белдзяржстрах - дзецям» — патлумачыла Наталля Бондар. - У рамках акцыі мы наведваем так званыя асаблівыя ўстановы адукацыі, якім патрабуецца падтрымка, і дорым сертыфікаты на розныя сумы, якія выдзяляюцца з спецыяльнага фонду. Пры гэтым кожны год накіроўваемся ў розныя раёны. На гэты раз Капыльшчына была абрана невыпадкова. Бо менавіта тут пройдуць два маштабныя мерапрыемствы - Дзень беларускага пісьменства і абласныя «Дажынкі».
З цеплынёй і радасцю сустракалі хлопцы і іншых гасцей, у ліку якіх апынулася старшыня райкама прафсаюза работнікаў адукацыі і навукі Марына Крэпская.
Яна павіншавала выхаванцаў школы-інтэрната са святам, а таксама ўручыла сертыфікаты на катанне на поні ў Мінскім абласным цэнтры алімпійскага рэзерву па конным спорце. Не абышлося і без салодкіх падарункаў, у якасці якіх Марына Іосіфаўна абрала любімы ласунак усіх дзяцей - марозіва.
Да ініцыятывы далучыліся таксама валанцёры руху «Добрае сэрца» БРСМ. У падарунак дзецям яны прынеслі кнігі.
Не засталіся ў баку ад мерапрыемства і работнікі Капыльскага РАНС.
Фотасесія з роставай лялькай Спасайкай, цікавы аповяд пра прыладу пажарнай машыны з дэманстрацыяй сірэны, пазнавальныя тэматычныя задачы і іншыя сюрпрызы даставілі выхаванцам школы-інтэрната непадробную радасць і асвяцілі іх твары шчаслівымі ўсмешкамі.
Аксана Міхайлоўская
Крыніца http://www.kopyl.by
