І асабліва важна, каб спецыяліст, які працуе за сучаснай тэхнікай, быў адукаваным і добрасумленным. Такім, якім і з'яўляецца ўрач ультрагукавой дыягностыкі (загадчык) кабінета УГД Кацярына Місевіч.
Добрай падставай сустрэцца і пагаварыць аб асаблівасцях прафесіі з Кацярынай Місевіч стала блізкае свята.
- Кацярына Аляксандраўна, чаму Вы выбралі прафесію медыка? - задаю суразмоўніцы традыцыйнае пытанне.
- Каб адказаць, трэба крыху зазірнуць у дзяцінства. Я нарадзілася ў Бабоўнi, і таму годным узорам для пераймання заўсёды быў лекар мясцовай участковай бальніцы, а пасля рэарганізацыі загадчык амбулаторыі Сцяпан Сцяпанавіч Ёрш і яго жонка лекар агульнай практыкі Марыя Мечыславаўна. Прыклад іх дружнай сям'і і поўнай самааддачы любімай справе і падштурхнуў мяне да выбару сцежкі медыка. Да таго ж біялогію ў Лясноўскай сярэдняй школе, дзе я вучылася, выкладала выдатны педагог Надзея Канстанцінаўна Караленка. Таму мне было лёгка выбраць профільныя прадметы, вывучыць іх і паступіць у Беларускі дзяржаўны медыцынскі універсітэт.
Для Кацярыны Місевіч галоўнае - убачыць чалавека знутры
- Як пачынаўся Ваш прафесійны шлях?
- Пасля заканчэння, атрымаўшы спецыяльнасць тэрапеўта, я вярнулася на Капыльшчыну. Першае месца працы - Цімкавіцкая ўчастковая бальніца. А праз год мне прапанавалі прайсці перападрыхтоўку як УГД-дыягност. Гэтую спецыяльнасць я атрымлівала ў Беларускай медыцынскай акадэміі паслядыпломнай адукацыі. І вось з 2009 года працую як лекар ультрагукавой дыягностыкі. Некаторы час даводзілася сумяшчаць з працай у тэрапеўтычным аддзяленні. Там вельмі добры калектыў і загадчык Аксана Мінчэня.
- Ці падабаецца Вам спецыяльнасць лекара ультрагукавой дыягностыкі?
- Так, гэта цікава - бачыць чалавека знутры. Але адначасова і разумееш, якая высокая адказнасць, бо ад выніку маёй працы залежыць правільнасць пастаноўкі дыягназу, а значыць, і лячэнне чалавека.
- Хто з калег дапамагаў Вам асвойваць асновы прафесіі?
- Мне дапамагаў лекар Анатоль Уласавец, які тады працаваў на УГД, а сёння з'яўляецца лекарам-эндаскапістам эндаскапічнага кабінета (загадчыкам). Шмат ездзіла ў Мінскую абласную бальніцу на кансультацыі. Заўсёды гатова адказаць на любыя пытанні і лекар функцыянальнай дыягностыкі (загадчык) кабінета функцыянальнай дыягностыкі Ірына Гулевіч. Побач са мной працуюць выдатныя лекары - Максім Юбко і Ліна Працкевiч, медсёстры Сняжана Рымашэўская, Людміла Паўлюшчык, Таццяна Мяцельская. І сёння я ўжо сама дапамагаю калегам. Маім першым вучнем стала лекар УГД Юлія Уласовіч.
- Даследаванне якіх органаў Вам даводзіцца рабіць?
- Мы выконваем даследаванне органаў брушной поласці і нырак, сасудаў (брахеацэфальных і сасудаў ніжніх канечнасцяў), сэрца, мяккіх тканін, лімфавузлоў. Для мяне лягчэй зрабіць УГД сэрца, як гэта ні дзіўна. Гэта цікавей, а складаней праводзіць даследаванне сасудаў.
- Кацярына Аляксандраўна, Вам даводзіцца «глядзець» і дарослых, і дзяцей. З кім працаваць лягчэй?
- У дзяцей выразней малюнак, усе органы бачны лепш. Але часам іх прыходзіцца ўгаворваць, таму што хлопчыкі і дзяўчынкі баяцца, яны не разумеюць, што з імі будуць рабіць. А вось мужчыны і жанчыны да УГД ставяцца спакайней, але ў сілу ўзроставых асаблівасцей глядзець іх складаней. І, калі шчыра, я магу не ўспомніць прозвішча чалавека або яго твар, але памятаю яго «знутры», г.зн. яго ўльтрагукавую карцінку. Таму што я як бы знаёмлюся з пацыентам адтуль, знутры.
Дыяна ТКАЧЭНКА
Крыніца http://www.kopyl.by