1 ліпеня на Капыльшчыне віншаванні прымала сям'я Бізевых з аграгарадка Быстрыца. Маладыя бацькі Давід і Ангеліна свайго першынца назвалі - Уладзіслаў.
Ва ўрачыстай абстаноўцы ў будынку Блеўчыцкага сельскага выканаўчага камітэта шчаслівых бацькоў віншавала начальнік аддзела ЗАГС райвыканкама Вікторыя Траяновіч.
- Нараджэнне дзіцяці - гэта не толькі важная і незабыўная падзея кожнай сям'і, але і вялікая адказнасць у яго выхаванні, як годнага грамадзяніна роднай Беларусі. А для дзіцяці гэты дзень - пачатак вялізнага і нязведанага шляху, выключна індывідуальнага, а для бацькоў і сваякоў - працяг роду, змена пакаленняў.
Першы сакратар Капыльскага раённага камітэта ГА «БРСМ» Вольга Сцяпанава ўручыла маладой сям'і для малога ў падарунак вышыванку з беларускім нацыянальным арнаментам.
Кіраўнік спраў сельвыканкама Вольга Пяцігорац таксама павіншавала і ўручыла падарункі маладым бацькам.
- Шчыра, ад душы, віншуем са шчаслівым падзеяй - з шчасным нараджэннем жаданага сыночка! Жадаем, каб нованароджаны малы рос вясёлым, здаровенькім здаравяком, разумным, дастаўляў велізарную радасць бацькам і стаў вашай надзейнай апорай і гонарам! - адзначыла Вольга.
Маладыя бацькі - Давід і Ангеліна ніколькі не чакалі, што ў гэты выдатны, цёплы дзень іх будуць настолькі ўрачыста віншаваць з важнай у жыцці падзеяй.
- Для мяне гэта было дзіўна і нечакана, - сказала маладая мама, - Нам вельмі прыемна, што наш Уладзіслаў ужо ў такім маленькім узросце апынуўся ў цэнтры ўвагі і атрымаў сваё першае адзенне ў выглядзе вышыванкі з нацыянальным арнаментам!
Наталля Давыдзенка
Крыніца http://www.kopyl.by
