Правілы вызначаюць парадак арганізацыі аховы жыцця людзей на водах і ўмовы карыстання воднымі аб'ектамі на тэрыторыі Рэспублікі Беларусь.
За каментаром мы звярнуліся да выканаўцы абавязкаў пракурора Капыльскага раёна Аляксея КРАТА:
- У сувязі з працягам купальнага сезона пракуратура Капыльскага раёна нагадвае, што згодна з п. 20 правілаў, адпачываючым нельга купацца ў забароненых для купання месцах рэк, азёр, вадасховішчаў, сажалак і іншых вадаёмаў; забруджваць і засмечваць вадаёмы, заязджаць на тэрыторыю пляжаў на транспартных сродках, парушаць рэжым утрымання водаахоўных зон. Ні ў якім выпадку нельга распіваць на пляжы спіртныя напоі; заплываць за буі і іншыя знакі, якія абазначаюць зону купання; падплываць да суднаў (маторных, ветразных, вёсельных лодак) і іншых плавальных сродкаў; узбірацца на тэхнічныя і папераджальныя знакі, буі і іншыя прадметы. Не скачыце ў ваду з лодак, катэраў, прычалаў, іншых збудаванняў, не прыстасаваных для гэтых мэт; не выкарыстоўвайце ратавальныя сродкі і рыштунак не па прызначэнні; не плавайце на дошках, ляжаках, бярвёнах, аўтакамерах, надзіманых матрацах. Нельга арганізоўваць гульні ў вадзе, звязаныя з ныраннем і захопам купаючыхся, а таксама здзяйсняць іншыя дзеянні, якія могуць стаць прычынай няшчаснага выпадку; падаваць ілжывыя сігналы трывогі; пакідаць малалетніх дзяцей без нагляду; сціраць на пляжах бялізну і купаць жывёл.
Варта звяртаць увагу на забаронныя надпісы «Купацца забаронена», «Небяспечна», пры наяўнасці якіх купацца не толькі забаронена, але і небяспечна для жыцця і здароўя.
Захаванне элементарных мер бяспекі на вадзе, адмова ад ужывання спіртных напояў - асноўны сродак прадухілення няшчасных выпадкаў.
На тэрыторыі Капыльскага раёна дазволенымі месцамі для купання з'яўляюцца сажалка № 2 г. Капыля, сажалка ў в. Багушы і вадаём у в. Астравок.
З мэтай прафілактыкі правапарушэнняў хацелася б адзначыць, што дзеючым заканадаўствам прадугледжана адказнасць за купанне ў забароненых месцах (артыкул 24.42 КоАП Рэспублікі Беларусь). Санкцыя гэтага артыкула прадугледжвае адказнасць у выглядзе штрафу ў памеры ад адной да трох базавых велічынь, што ў грашовым выражэнні складае ад 29 да 87 рублёў.
Пры выкананні вышэйзгаданых забарон вы захаваеце свае жыццё і здароўе.
Падрыхтаваў Сяргей КОЗЕЛ
Крыніца http://www.kopyl.by