Гумар, жарты, забаўныя прыпеўкі і смех да слёз сталі візітнай карткай рэспубліканскага фестывалю народнага гумару «Аўцюкі-2021». Нацыянальнае свята адзначыла свой першы юбілей - 10 гадоў шчырага прамяністага гумару і ўнікальных самабытных традыцый.
Тут сабраліся лепшыя аматарскія і прафесійныя творчыя калектывы з усіх рэгіёнаў Беларусі. Мінскую вобласць на фестывалі прадставілі народны тэатр гульні і гумару «Капыльскія пацехі» і народны калектыў народнага гумару «Дубінскія фанабэры» Валожынскага раёна. Гумар і смех гучалі ў Калінкавіцкім раёне на працягу двух дзён. Гасцей свята і мясцовых жыхароў прываблівалі тэматычныя падворкі, якія вабілі стракатасцю і водарамі. Гаспадары кожнага двара здзіўлялі арыгінальнымі стравамі нацыянальнай кухні, шчодра запраўленымі гумарам, святочнымі абрадамі, незвычайным афармленнем і народнымі песнямі і анекдотамі.
У ліку гумарыстаў Міншчыны Яўгенiя Левус з Грозаўскага СДК (у цэнтры)
Нашы артысты далі канцэрт у аграгарадку Сырод, а ўжо ў другі дзень у саміх Аўцюках прынялі ўдзел у фестывалі. На суд гледачоў капыляне вынеслі забаўляльна-гульнявую праграму «Агародны рэлакс». Адзначым, што падчас конкурснай праграмы творчыя калектывы і выканаўцы змагаліся за перамогу ў розных намінацыях: «Прыпеўка», «Анекдот. Байка», «Тэатр мініяцюр», «Пародыя на папулярных і вядомых людзей «Кропка ў кропку», «Iнструментальны конкурс «Я дрынчу на чым хачу». Як вынік — каманда Мінскай вобласці ў намінацыі «Прыпеўка» атрымала Дыплом III ступені. Гэта заслуга Валожынскага калектыву. А вось капыляне вярнуліся з дыпломам II ступені ў намінацыі «Тэатр мініяцюр». Сваім выступленнем гледачоў таксама ўразіў наш мясцовы «Стас Міхайлаў» у выкананні Дзяніса Сельвановіча. За пародыю на знакамітага артыста капіляне адзначаны дыпломам I ступені ў намінацыі «Кропка ў кропку».
- Мы ў чацвёрты раз прымаем удзел у гэтым фестывалі, - кажа рэжысёр народнага тэатра гульні і гумару «Капыльскія пацехі» Любоў Галубовіч. - Двойчы былі лаўрэатамі ў гульнявых праграмах. Годна выступілі і сёлета. Усе намінацыі мы склалі ў адзіны сюжэт і паказалі паўгадзінную праграму «Агародны рэлакс». Паколькі наша выступленне праходзіла ў адзінай сюжэтнай лініі, то адрознівалася ад іншых. Мы паднялі ўсю залу, прысутныя былі не толькі гледачамі, але і непасрэднымі ўдзельнікамі нашага «Агароднага рэлаксу». У чарговы раз капыльскія гумарысты, сярод якіх таксама былі «Весялухі» з Грозаўскага СДК і лотвінскія ўдзельнікі мастацкай самадзейнасці, на ўласным прыкладзе даказалі, як з гумарам глядзець на жыццё.
Таццяна БОХАН
Крыніца http://www.kopyl.by