Павіншавалі перадавікоў, як і належыць, прама ў полi з уручэннем падзячных лістоў і грамат, грашовых прэмій і памятных падарункаў. Падзякаваць за працу механізатарам прыехалі старшыня райвыканкама Сяргей Пілішчык і першы намеснік старшыні райвыканкама - начальнік упраўлення па сельскай гаспадарцы і харчаванні райвыканкама Віталь Ракевіч.
Трактарыст-машыніст Сяргей Клачко - з дынастыі механізатараў. У яго салідны хлебаробскі стаж: цяперашняе жніво 23-е па ліку. У леташнюю ўборачную аграрыя ўшаноўвалі тройчы: за першыя намалочаныя адну, дзве і тры тысячы тон збожжа.
- Усё маё жыццё звязана з сельскай гаспадаркай, - кажа Сяргей Уладзіміравіч. - Вядома, люблю сваю працу, падабаецца працаваць на зямлі, тэхніку люблю. Напэўна таму і атрымліваюцца добрыя вынікі. Кожны дзень у полi з світання да заходу. Хлеб сваёй працай зарабляем. Летась агульны ўклад экіпажа ў раённы каравай склаў 3025 тон збожжа. Кожны год памочнікі ў мяне мяняюцца, бо трэба ж дзяліцца вопытам з моладдзю.
Здымак на памяць — Леанід Буцевіч, Сяргей Пілішчык, Сяргей Клачко, Валерый Душэўскі і Віталь Ракевіч
- Выязджаючы на хлебныя палі, стараемся выкарыстоўваць кожную пагодлівую гадзіну — уступае ў размову Валерый Душэўскі, нядаўні выпускнік Капыльскага дзяржаўнага каледжа. - Выдатна разумеем, што ў цяперашні час наша мэта - добра папрацаваць і прыбраць своечасова ўраджай.
- Уборку хлеба ў гаспадарцы мы давяраем дасведчаным механізатарам — адзначыў дырэктар сельгаспрадпрыемства Леанід Буцевіч. - Таму прыклад - старшы камбайнер Сяргей Клачко. Пабольш бы такіх працаўнікоў, якія ведаюць сваю справу.
Словы ўдзячнасці лідарам жніва выказала таксама старшыня РК прафсаюза работнікаў АПК Ірына Сцяпура:
- Дзякуй за працавітасць і вернасць прафесіі. Выпадковых вынікаў у сельскай гаспадарцы не бывае. За кожным намалотам стаіць мэтанакіраваная праца і адказнасць. Моцнага Вам здароўя, далейшых працоўных поспехаў, міру і дабра.
Да віншаванняў у адрас камбайнераў далучылася і першасная прафсаюзная арганізацыя УП «ПIК-Лясное». Вядома ж, гучала ў гэты дзень і песня над полем - радавалі сваімі нумарамі артысты Лотвінскага цэнтра аматарскай творчасці Станіслаў Цвірко і Уладзімір Дрожжа.
Таццяна БОХАН
Крыніца http://www.kopyl.by
