Акрамя стацыянарных працуюць і перасоўныя. Так, у Капыльскай дзіцячай школе мастацтваў прайшла вакцынацыя, дзе жадаючыя змаглі зрабіць прышчэпку. Прыйшлі людзі розных узростаў, аб'яднаных адной мэтай: захаваць здароўе.
Перад правядзеннем вакцынацыі ўсіх прыйшоўшых агледзеў лекар агульнай практыкі Капыльскай ЦРБ Віталь Лукша, а прышчэпку рабіла медсястра агульнай практыкі паліклінікі Капыльскай ЦРБ Святлана Новік. У ліку першых, прышчэпленых – выкладчык ДШМ Наталля Мядзведская.
– Я вельмі доўга думала, рабіць прышчэпку ці не, – расказвае Наталля Міхайлаўна. - У лістападзе мінулага года перахварэла, і ў сувязі з тым, што ў гэтым сезоне людзі ўсё часцей пачалі хварэць, вырашыла вакцынавацца. Працую я з дзецьмі, таму ў першую чаргу засцерагшы сябе, перасцерагаю і навакольных ад магчымай хваробы.
На сёння імунізацыя застаецца самым надзейным спосабам абараніць сябе і блізкіх ад ужо зацягнуўшайся хваробы. Неабходна вакцынаваць як мага больш адсоткаў насельніцтва для таго, каб утаймаваць вірус.
Лекары інфармуюць, што ў першыя два-тры дні пасля прышчэпкі могуць назірацца сімптомы, падобныя на прастуду. У асноўным, лёгкае недамаганне, тэмпература 37,2˚C. У большасці выпадкаў ніякай рэакцыі няма.
Таксама медыкі папярэджваюць пра наступствы самалячэння. Наколькі эфектыўны народныя сродкі, альбо навамодныя пасты аб лячэнні хваробы з сацыяльных сетак, дзе кожны наровіць даць слушныя парады з асабістага вопыту, не ведае ніхто. І, аддаючы перавагу гэтаму віду самалячэння, чалавек у першую чаргу падвяргае сваё жыццё небяспецы. Таму, адчуўшы недамаганне, не трэба губляць каштоўны час, а адразу звяртацца па медыцынскую дапамогу.
Каб данесці важнасць вакцынацыі да насельніцтва, установы аховы здароўя, розныя грамадскія арганізацыі і СМІ інфармуюць і праводзяць прафілактычныя акцыі. Сапраўды, сёння нельга расслабляцца. Паводле звестак Сусветнай арганізацыі аховы здароўя, эфектыўна спыніць распаўсюджванне новых штамаў каранавіруса пакуль да канца не ўдаецца. І на цяперашні момант вакцынацыя з'яўляецца самай магутнай зброяй у барацьбе з COVID-19.
Аднак людзі, якія зрабілі прышчэпку, ні ў якім выпадку не павінны расслабляцца. Па-ранейшаму, неабходна выконваць ужо ўсім вядомыя патрабаванні: часта мыць рукі з мылам, апрацоўваць іх антысептычным сродкам; выконваць дыстанцыю і этыкет; весці здаровы лад жыцця; абараняць органы дыхання з дапамогай медыцынскай маскі. І самае галоўнае: заставацца здаровымі і не хварэць!
Наталля Давыдзенка
Крыніца http://www.kopyl.by