«Выпрацаваць калектыўны імунітэт!– з гэтай мэтай у каледжы праводзіцца інфармацыйна-тлумачальная праца аб неабходнасці імунізацыі: аформлены стэнды, пастаянна транслююцца відэаролікі па дадзенай тэме, арганізаваны сустрэчы з медыцынскімі работнікамі. Падчас гутаркі тлумачацца парадак, агульныя патрабаванні, паказанні і супрацьпаказанні, умовы правядзення вакцынацыі.
Кітайскай вакцынай і расійскай «Спадарожнік Лайт» вакцынаваны 57 працэнтаў калектыву і 25 паўналетніх навучэнцаў каледжа. Усе яны, як і належыць, перад працэдурай прайшлі медычны агляд: вымералі сатурацыю, тэмпературу цела, пульс і ціск, праверылі іншыя важныя паказчыкі стану здароўя. Пасля чаго былі дапушчаны да вакцынацыі.
Святлана Ліневіч
Выкладчык Святлана Ліневіч, разумеючы наколькі важны прыклад педагога, зрабіла прышчэпку ў ліку першых.
- Навошта трэба вакцынавацца? Ды затым, што я працую з вялікай колькасцю навучэнцаў. Каля 60-100 чалавек прыходзіць на заняткі ў навучальны кабінет на працягу працоўнага дня, а значыць ёсць высокая ступень рызыкі заражэння «кавiд», - кажа Святлана Віктараўна. - Прышчаплялася кітайскай вакцынай, перанесла лёгка, якіх-небудзь змяненняў у стане свайго здароўя не назірала. Адчуваю сябе вельмі спакойна, не баючыся заразіцца і заразіць іншых.
Кацярына Богнат
Навучэнка вучэбнай групы 5кл Кацярына Богнат далучылася да ініцыятывы і атрымала палегчаны варыянт расійскай вакцыны «Спадарожнік V», якая не патрабуе ўвядзення другой дозы прэпарата, - «Спадарожнік Лайт»:
- Рабіць прышчэпку ці не - выбар кожнага. Спачатку і я сумнявалася, але, спадзяюся, што прышчэпка павысіць мае шанцы на тое, што хвароба (нават калі я захварэю) пройдзе бессімптомна або ў лёгкай форме.
Анастасія Беркі
- Лічу, што вакцынацыя - адзін з самых эфектыўных спосабаў стварэння як індывідуальнага, так і калектыўнага імунітэту, - падтрымлівае аднагрупніцу Анастасія Беркі. – Асабіста для мяне не было сумневаў вакцынавацца або не, так як наступстваў ад каранавiруснай інфекцыі баюся больш, чым ад прышчэпкі. Разумею, што калектыўны імунітэт выратуе нас ад гэтай хваробы, і гэта эпапея з абмежаваннямі і нашэннем масак скончыцца.
Пандэмія сама па сабе нікуды не дзенецца. Для калектыўнага імунітэту ад COVID-19 трэба мінімум 60-70% прышчэпленых. Нагадаем, што вакцынацыю супраць COVID-19 праводзяць у паліклініцы Капыльскай ЦРБ і ўстановах аховы здароўя раёна. Акрамя стацыянарных, арганізавана праца і перасоўных пунктаў вакцынавання. Па словах медыкаў, часовым супрацьпаказаннем з'яўляюцца вострыя інфекцыйныя і неінфекцыйныя захворванні і абвастрэнне хранічных захворванняў. Пачакаць з прышчэпкай варта і ў тым выпадку, калі вы на працягу 14 дзён да яе кантактавалі з хворым каранавірусам чалавекам. Да пераліку пастаянных супрацьпаказанняў ставіцца гіперадчувальнасць да кампанентаў вакцыны, цяжарнасць і перыяд груднога гадавання. Таксама ў прышчэпцы адмовяць пацыенту, узрост якога менш за 18 гадоў.
Таццяна БОХАН
крыніца http://www.kopyl.by
