Хлопцам неабходна было выбраць дысцыпліну і намінацыю, стварыць свой праект на Scratch або RobboScratch і падаць заяўку для ўдзелу. А пазней атрымаць пацверджанне ад мадэратара і чакаць вынікаў нацыянальнага этапу, у якім і перамаглі.
Так, навучэнец 3 класа Мітрый Маргун стаў адным з лаўрэатаў у адборачным туры. У намінацыі «Мой свет» ён заняў I месца, зрабіўшы сацыяльны праект у асяроддзі праграмавання Scratch на тэму «Навошта патрэбны мурашнікі». Ад спонсараў адборачнага тура Мітрый атрымаў каштоўныя падарункі і дыплом I ступені, падпісаны старшынёй аргкамітэта Беларускага нацыянальнага этапу Сяргеем Балбуцкім.
А праца чацвёртакласніка Дзяміда Кайко ў намінацыі «Мая кніга» заняла V месца і таксама была прадстаўлена ў асяроддзі праграмавання Scratch. Удзельнік анімаваў любімы верш Андрэя Усачова «Калі кінуць камень уверх».
Па выніках адборачнага тура таленавітыя Мітрый і Дзямід прайшлі ў фінал, які адбыўся 25 кастрычніка і праходзіў у фармаце завочнага конкурса. Усе ўдзельнікі алімпіяды спаборнічалі ў стварэнні робатаў, анімацыйных гісторый, камп'ютарных гульняў і віртуальных разумных дамоў.
Дарэчы! У V Міжнароднай Scratch-Алімпіядзе па крэатыўным праграмаванні 2021 года прынялі ўдзел прадстаўнікі 30 краін свету. Фінал прайшоў у фармаце завочнага конкурсу, у яго ўвайшлі 193 удзельнікі, 63 з іх - з Беларусі. Мінскую вобласць на міжнародных спаборніцтвах прадстаўлялі 15 удзельнікаў з Капыльскага, Барысаўскага, Дзяржынскага, Смалявіцкага, Пухавіцкага раёнаў.
Для ўдзелу ў фінале Мітрый у намінацыі «ScratchKid», а Дзямід у «ScratchTween» падрыхтавалі творчыя праекты. Кожны павінен быў выканаць тры заданні: прайсці агульны тэст, апублікаваны на афіцыйным сайце Scratch-Алімпіяды; вырашыць алгарытмічную задачу і крэатыўную задачу. Неабходна было выбраць адну з важных сусветных задач (здаровы лад жыцця; праблемы сусветнага акіяна, або сусветнага галадання; транспарт будучыні; людзі і робаты) і стварыць Scratch-праект у вольнай форме для прыцягнення ўвагі грамадскасці да яго актуальнасці або рашэння.
Як адзначыла педагог Людміла Хаміцэвіч, дадзенае мерапрыемства арганізавана з мэтай падтрымкі ініцыятыў навучэнцаў і педагогаў у вывучэнні крэатыўнага праграмавання ў Scratch, уцягванню дзяцей і моладзі ў інавацыйныя інжынерныя праекты. Scratch-праграмістам можа стаць нават дзіця 6-7 гадоў. Трэба ўмець працаваць з мышкай, запускаць праграмы з працоўнага стала. Крок за крокам, алгарытм за алгарытмам - і атрымліваецца сапраўдная віртуальная рэальнасць. Таксама яна адзначыла, што ўсе заданні Алімпіяды былі на англійскай мове, але ўсё ж хлопцы нягледзячы на тое, што не валодаюць замежнай мовай на высокім узроўні, некаторыя заданні з лёгкасцю перакладалі і выконвалі без дапамогі кіраўніка. І хай у фінале Мітрый і Дзямід гэтым разам не ўвайшлі ў пяцёрку лепшых, яны будуць і далей працягваць удзельнічаць у алімпіядзе, бо гэта выдатная магчымасць праявіць сябе творча і ў якасці юнага праграміста.
Наталля Давыдзенка
Крыніца http://www.kopyl.by
