Сродкі для набыцця абсталявання вылучыў Беларускі рэспубліканскі прафесійны саюз работнікаў аграпрамысловага комплексу. Выказаўшы словы ўдзячнасці і падзякі медыкам, якія выдатна спраўляюцца са сваёй працай у пікавы перыяд захворвання каранавіруснай інфекцыяй, старшыня райвыканкама Сяргей Пілішчык адзначыў, што бязвыплатная спонсарская дапамога мае мэтавае прызначэнне - умацаванне матэрыяльна-тэхнічнай базы ўстаноў аховы здароўя ва ўмовах аказання медыцынскай дапамогі пацыентам з COVID-19.
- Новы апарат для кіслароднай тэрапіі ў дадатак да наяўных у бальніцы трыццаці кіслародных кропак дазволіць палепшыць медыцынскую дапамогу пацыентам з COVID-19, - кажа галоўны ўрач цэнтральнай раённай бальніцы Сяргей Пацяйковіч. - Кіслародныя канцэнтратары простыя ў выкарыстанні: уключыў у разетку, націснуў на кнопку - і працэс пайшоў. Яны абсталяваны бактэрыяльным фільтрам, валодаюць прадукцыйнасцю 5 л у хвіліну. Вядома, стацыянарная кіслародная кропка хоць і выдае большы паток, усё ж такі прывязана да вызначанага памяшкання. Перавага партатыўнага кіслароднага канцэнтратара ў тым, што ён можа працаваць дзе заўгодна, яго можна перамяшчаць ад пацыента да пацыента, і ён не залежыць ад ёмістасці і магутнасці кіслароднай станцыі. Дарэчы, новы апарат будзе запатрабаваны ў перапрафіляваным інфекцыйным аддзяленні № 1, дзе раней была гінекалогія.
- Мы вельмі ўдзячны ўсім, хто дапамагае нашай бальніцы, - адзначыла старшыня першаснай прафсаюзнай арганізацыі Капыльскай ЦРБ Людміла Лагун. - Гэта вялікі падарунак для ўсіх нашых пацыентаў і запамога ў працы медыкаў, якія вытрымліваюць барацьбу з пандэміяй.
Па словах старшыні Капыльскага РК прафсаюза работнікаў АПК Ірыны Сцяпура, прафсаюз працягвае аказваць матэрыяльную дапамогу медыкам.
- Самае каштоўнае для чалавека - жыццё. Любы неабыякавы чалавек павінен рабіць дабро і дапамагаць навакольным. Не застаецца ў баку ад добрай справы і прафсаюз работнікаў аграпрамысловага комплексу. Раней 200 спецыяльных ахоўных камбінезонаў для медыцынскага персаналу Капыльскай ЦРБ перадаў старшыня Мінскага абласнога камітэта прафсаюза работнікаў АПК Міхаіл Бода — удакладніла Ірына Станіславаўна. - Таксама кожная пяршоўка пералічвае грашовыя сродкі ў памеры 2% ад членскіх прафсаюзных узносаў на адпаведны разліковы рахунак Мінскага абласнога аб'яднання прафсаюзаў для фінансавання мерапрыемстваў, якія праводзяцца раённымі, гарадскімі аб'яднаннямі прафсаюзаў у барацьбе з каранавіруснай інфекцыяй. Так выбудоўваецца свайго роду ланцужок узаемадапамогі на карысць жыцця.
Аўтар: Таццяна БОХАН
Крыніца: http://www.kopyl.by
