Пад кіраўніцтвам высокакваліфікаванага педагога і кіраўніка ўзорнай студыі эстраднага вакалу «Кліо» Таццяны Ермаловіч былі падрыхтаваны нумары ў шасці намінацыях і прадстаўлены для конкурсу. І ў дзвюх намінацыях юныя капыляне сталі пераможцамі.
Так, у намінацыі «Ансамбль» (6-12 гадоў) узнагароджана ўзорная студыя эстраднага вакалу «Кліо», якая працуе пры цэнтры творчасці дзяцей і моладзі Капыльскага раёна, якая прадставіла песню «Мама Беларусь». Рабяты сталі пераможцамі, за што атрымалі Дыплом I ступені.
«Кліо» - неаднаразовыя пераможцы разнастайных абласных, рэспубліканскіх і міжнародных конкурсаў, фестываляў. Гэта калектыў энергічных, творчых, харызматычных і таленавітых хлопчыкаў і дзяўчынак, якія займаюцца любімай справай, заўсёды здзіўляюць і захапляюць гледача сваім выкананнем.
У намінацыі «Індывідуальнае выкананне» (10-13 гадоў) у жанры эстрадная песня з кампазіцыяй «Бусел на даху» ярка выступіла юная і таленавітая Мілана Іванова, навучэнка сярэдняй школы № 2 г. Капыля, якая стала ўладальніцай Дыплома II ступені.
- Мілана - творчая, здольная і адораная дзяўчынка. З пачатковай школы наведвае аб'яднанні па інтарэсах, факультатыў па музыцы «Вакальны ансамбль», дзіцячую школу мастацтваў і з'яўляецца выхаванкай студыі «Кліо». Самае галоўнае - у яе ёсць жаданне, і гэта важны аспект у дасягненні поспеху, - так характарызуе юную вакалістку Таццяна Барысаўна.
Для таго, каб таленавітыя капыляне на высокім узроўні паказалі вакальнае выканальніцкае майстэрства і артыстызм, прыйшлося ўпарта папрацаваць.
— Мы заўсёды напрацоўваем рэпертуар, —кажа Таццяна Барысаўна. - На працягу ўсёй працы з дзецьмі ў аб'яднанні па інтарэсах эстраднага вакалу праглядаем розную тэматыку, і, калі абвясцілі конкурс «Акорды мужнасці», нам было што прапанаваць і годна выступіць. Варта адзначыць, што розныя выступленні і праекты ўдзельнікаў узорнай студыі эстраднага вакалу «Кліо» можна паглядзець на YouTube канале «Кліо», а таксама падпісацца, націснуўшы на званочак, і тым самым падтрымаць юных і таленавітых капылян.
Аўтар: Наталля ДАВЫДЗЕНКА
Крыніца: http://www.kopyl.by
