Юная выхаванка цэнтра Дар'я Мароцкая малюе за мальбертам. А ўсе творчыя работы вучняў і педагогаў займаюць дастойныя месцы на выставах.
Сёння ёсць цудоўная магчымасць займацца любімым захапленнем не толькі дома, але і ва ўстановах адукацыі. Напрыклад, у цэнтры творчасці дзяцей і моладзі Капыльскага раёна. Узначальвае цэнтр Таццяна Васіленка, а дапамагае ёй у рабоце з дзецьмі намеснік дырэктара па вучэбна-выхаваўчай рабоце Таццяна Бурак. Яна больш за пятнаццаць гадоў працуе ў гэтай сферы і ведае ўсе плюсы і мінусы прафесіі. Кожны педагог падыходзіць да сваёй працы з поўнай адказнасцю і аддачай. Метадысты Вольга Максіменя і Марыя Гардзей, педагог-арганізатар Святлана Зуева і культарганізатар Алена Чыстая, нягледзячы на складанасці пастаўленых задач, падыходзяць да сваёй працы з энтузіязмам, кожны раз практыкуючы нешта новае.
Калектыў цэнтра - гэта 9 педагогаў дадатковай адукацыі: Надзея Баўкуновіч, якая працуе ў напрамку «Вясёлка творчасці», Кацярына Іванова - «Майстры лялек» і «Юныя ўмельцы», Таццяна Кадоліч – «Рознакаляровая палітра», Іван Жаланны – «Архітэктурнае мадэляванне», «Пачатковае тэхнічнае мадэляванне», «Папяровае мадэляванне», Наталля Базыльчык – «Цуды з салёнага цеста», «Умелыя рукі», Кацярына Сыцько – «Аплікацыя саломкай», «Мяккая цацка», Ірына Дуброўская – «Энкаўстыка», «Майстрыца », «Лялька», Марына Ткачук – «Лялечны тэатр», «Забаўнікі», Ірына Барсукевіч – «Сучасны эстрадны танец», «Асновы рытмікі і харэаграфіі», «Сцэнічная харэаграфія».
Калектыў знаходзіцца ў пастаянным творчым пошуку. Удасканаленню майстэрства педагогаў і дзяцей садзейнічае ўдзел у розных абласных і рэспубліканскіх выставах: «Калядная зорка», «Дзеці. Вада. Бяспека», «Акорды мужнасці», «Лічбавая граматнасць», «Лёд. Кветкі. Фантазія» і многіх іншых, а таксама конкурсах аб'яднанняў па інтарэсах, за што ўдастоены дыпломаў розных ступеней.
Ахоп працай аб'яднанняў па інтарэсах у 2021/2022 навучальным годзе склаў 53,9%, што складае больш за 1400 навучэнцаў, а гэта 102 групы, у склад якіх уваходзіць 24 групы ў сельскай мясцовасці і 78 - у горадзе. Найбольшым попытам традыцыйна карыстаюцца аб'яднанні па інтарэсах мастацкага профілю. Іх сёлета 57 па кірунках: харэаграфія, музыка і дэкаратыўна-прыкладная творчасць. У гэтым напрамку займаецца больш за 790 навучэнцаў. Фізкультурна-спартыўным профілем ахоплена 159 навучэнцаў, дзе працуе 13 груп. Тэхнічны профіль складаюць 7 груп, і ў гэтым напрамку навучаюцца больш за 70 навучэнцаў. Грамадска-гуманітарны налічвае 19 груп, што складае больш за 300 навучэнцаў, у культурна-дасугавым профілі – 3 групы, якія наведваюць 45 навучэнцаў. Таксама прадстаўлены асобна тры групы па напрамках - натуральна-матэматычны, турыстычны і краязнаўчы, дзе навучаецца па 12 навучэнцаў у кожным. У гэтым годзе пачалі практыкаваць анлайн майстар-класы на афіцыйным сайце ўстановы і ў сацыяльнай сетцы Instagram пад назвай centr_tvorchestva_kopyl, дзе можна ўбачыць розныя мерапрыемствы навучальнага характару.
Немалаважны і той факт, што цэнтр творчасці цесна супрацоўнічае з установамі адукацыі раёна, таму 32 педагогі дадатковай адукацыі працуюць сумяшчальнікамі і ажыццяўляюць сваю дзейнасць на базе школ горада і раёна. Падчас канікулаў педагогі цэнтра арганізоўваюць вольны час дзяцей, якія наведваюць аздараўленчыя пляцоўкі і лагеры на базе ўстаноў адукацыі Капыля. Праводзіцца работа па аб'яднаннях згодна з устаноўленым раскладам, майстар-класы, экскурсіі, тэматычныя квэсты ў залежнасці ад напрамку дзейнасці аздараўленчых лагераў: «Правілы дарожнага руху», «Пажарная бяспека» і іншыя. Усе дзеці ўцягнуты ў працу і з вялізным задавальненнем ёю займаюцца.
Малады спецыяліст і харэограф Ірына Барсукевіч родам з Салігорска і па размеркаванні прыехала ў Капыль.
- Сваю прафесію я выбрала нездарма, - кажа Ірына Яўгенаўна. - Я з чатырох гадоў займаюся танцамі і для сябе вызначана вырашыла, што буду навучаць харэаграфіі і іншых. Мне падабаецца працаваць з дзецьмі, яны заўсёды пазітыўна настроены на працу і кожны раз з усмешкамі прыходзяць на заняткі.
І сапраўды, асноўная і першапачатковая задача педагога – захапіць, зацікавіць дзяцей сваім добрым стаўленнем да кожнага. І ўсё гэта для таго, каб хлопцы хацелі займацца, развіваць і раскрываць свае таленты.
Адным са складаных напрамкаў ва ўстанове з'яўляецца «Архітэктурнае мадэляванне». І як кажа педагог Іван Жаланны, гэта вельмі карпатлівая праца з драбнюткімі дэталямі, часам нават пад павелічальным шклом.
Прыгатаваць цеста з мукі, солі і вады Наталля Базыльчык можа з заплюшчанымі вачамі. Яна далёка не адзін год займаецца каханай справай, чым захапіла сваіх вучняў. За плячыма ў Наталлі Мікалаеўны немалы досвед працы. З розных вырабаў і сувеніраў, вырабленых ёю і яе падапечнымі, смела можна зрабіць вялізную выставу.
А ці ведае хто-небудзь, што такое энкаўстыка? На гэта пытанне вам ясна і дакладна адкажа спецыяліст цэнтра Ірына Дуброўская. Нерэальна прыгожыя працы, выкананыя ў тэхніцы жывапісу, у якой злучным рэчывам фарбаў з'яўляецца воск. Жывапіс выконваецца фарбамі ў расплаўленым выглядзе. Дарэчы, у гэтай тэхніцы напісаны многія раннехрысціянскія іконы.
Яшчэ адной адметнай рысай цэнтра з'яўляецца ўзорная студыя эстраднага вакалу «Кліо», дзе пад чулым кіраўніцтвам педагога Таццяны Ермаловіч навучаюцца дзеці розных узростаў. Навучанне спевам - гэта не толькі прафесійнае вакальнае майстэрства, але і ўменне артыстычна трымацца на сцэне. Менавіта такое ўменне паказваюць удзельнікі студыі «Кліё». Нагадаем, здольныя і таленавітыя хлопцы неаднаразова былі пераможцамі на розных конкурсах, займаючы дастойныя месцы і ўзнагароды.
Наталля ДАВЫДЗЕНКА
Крыніца http://www.kopyl.by
