У свяце прынялі ўдзел прадстаўнікі райвыканкама, Белтэлекама, жыллёва-камунальнай гаспадаркі, спартсмены і навучэнцы гарадскіх школ.
Адзначым, што стварэнню новай спартыўнай пляцоўкі для арганізацыі вольнага часу грамадзян спрыяла апытанне грамадскай думкі, якое неаднаразова праводзілася на старонках нашай раённай газеты і на сайце выдання. Характэрна, што меркаванні большасці маладых сем'яў, якія пражываюць у так званым «прамраёне», пачуты. Менавіта яны прапаноўвалі размясціць стрыт воркаут па вуліцы Цімкавіцкай, бо раён малады, шмат дзетак. Месца выбрана невыпадкова: тут ужо ёсць пешаходныя дарожкі, радуюць вока маладыя бярозы, дэкаратыўныя дрэвы і, самае галоўнае, — участак парка ізаляваны ад праезнай часткі, што стварае ўмовы для бяспечнага правядзення часу дзяцей.
Мясцовая ініцыятыва рэалізавана дзякуючы рэспубліканскаму праекту «Свята нашага двара разам з«Ясна», у рамках якой кампанія абсталюе пляцоўкі рознымі спартыўнымі комплексамі ў гарадах Беларусі. Фінансаванне склала больш за дзевяць тысяч беларускіх рублёў. Урачысты момант — перарэзванне чырвонай стужкі, якая сімвалізуе адкрыццё аб'екта.
- Брэнд «Ясная» - гэта адзін з самых паспяховых праектаў нашай кампаніі, які змяняе жыццё да лепшага — адзначыў начальнік Капыльскага ўчастка электрасувязі Нясвіжскага ЗВЭС Мінскага філіяла РУП «Белтэлекам» Віктар Журыд. - У першую чаргу праект накіраваны на аб'яднанне і згуртаванне жыхароў раёна, стварэнне годных умоў для заняткаў спортам усёй сям'ёй.
- Першая такая пляцоўка знаходзіцца на вул. Максіма Горкага і карыстаецца вялікай папулярнасцю, асабліва ў моладзі, - адзначыў у прывітальным слове Старшыня Капыльскага райвыканкама Сяргей Пілішчык. - Спадзяемся, што яна стане не толькі ўпрыгожваннем горада, але такія збудаванні будуць запатрабаваны ў моладзі і стануць даступныя для наведванняў усім узроставым групам.
Да прысутных звярнулася і намеснік старшыні райвыканкама Святлана Лосiк:
- Гэта добры падарунак не толькі для гэтага мікрараёна, але і для ўсяго горада. А каб падтрымліваць развіццё спорту і зрабіць яго масавым, урокі фізічнай культуры і спорту для школьнікаў цалкам могуць праходзіць менавіта тут. Наяўнасць падобнага збудавання дазволіць не толькі далучыць жыхароў да здаровага ладу жыцця, рэгулярных заняткаў спортам, але і будзе спрыяць зніжэнню ўзроўню дзіцячай і падлеткавай злачыннасці ў горадзе, адмовы моладзі ад шкодных звычак.
Пляцоўка пабудавана па сучасных тэхналогіях. Яе мантажом займаліся работнікі Капыльскага ЖКГ, якія імкнуліся выканаць сваю працу максімальна якасна. Спартыўныя снарады зручныя і надзейныя, выглядаюць вельмі эстэтычна. Пакрыццё пляцоўкі зроблена з гумы, што стварае дадатковы камфорт і бяспеку для заняткаў. Гэта змаглі ацаніць юныя спартсмены, якія падчас свята правялі паказальныя выступленні.
- Выдатна, што ў нашым двары з'явілася ўніверсальная спартпляцоўка — кажа навучэнец СШ № 3 г. Капыля Уладзіслаў Есмантовіч. - Парадавала аснашчанасць пляцоўкі, прасторнасць, займацца вельмі зручна.
- Я вяду здаровы лад жыцця — дзеліцца навучэнец СШ № 2 г. Капыля Мікіта Саўчанка. - Выдатная пляцоўка, вельмі добрыя турнікі, падабаецца іх яркі аранжавы колер, які сімвалізуе жыццёвую сілу. Нягледзячы на аддаленасць аб'екта з задавальненнем буду сюды прыходзіць разам з сябрамі.
Таццяна БОХАН
Крыніца http://www.kopyl.by
