У пачатку мерапрыемства Сяргей Міхайлавіч праінфармаваў аб сітуацыі з кавідам на Капыльшчыне:
- Здароўе насельніцтва знаходзіцца ў цэнтры ўвагі кіраўніцтва раёна. Неабходна фарміраваць калектыўны імунітэт з дапамогай вакцынацыі супраць каранавiруснай інфекцыі. У першую чаргу павінны прышчапляцца тыя, хто непасрэдна працуе ў кантакце з людзьмі - педагогі, работнікі сацыяльнай сферы, паштальёны і інш., - падкрэсліў кіраўнік раёна.
На пытанне аб паляпшэнні якасці стану дарог у населеных пунктах паведамілі, што аб'екты абслугоўвання будуць перададзены ад ЖКГ да ДРБУ на 5 гадоў. Акрамя таго, на тэрыторыі сельсавета вядзецца будаўніцтва фермы па вырошчванні і перапрацоўцы мяса індычкі. Забудоўшчыкам з'яўляецца ААТ «Агракамбінат «Дзяржынскі», кіраўніцтва якога запэўніла, што ўсе дарогі, якія вядуць да аб'екта будаўніцтва, будуць заасфальтаваны, у тым ліку якія праходзяць праз населеныя пункты.
Старшыня раённага Савета дэпутатаў Ірына Кісляк азнаёміла з правіламі зносу пустуючых дамоў і афармлення неабходных дакументаў, спілу аварыйных дрэў, абкошвання травы паміж плотам і тратуарам (дарогай) у населеных пунктах. Ішла размова і аб паляпшэнні вулічнага асвятлення ў 2022 годзе. Таксама Ірына Мікалаеўна па праблеме ўспышкі птушынага грыпу дала тлумачэнне: варта выконваць санітарна-гігіенічныя нормы ўтрымання птушкі і г. д., а пры захворванні і гібелі абавязкова паведамляць у ветэрынарную службу раёна.
На паведамленні жыхароў вёсак Слабада-Кучынка і Андросаўшчына, якія пражываюць паблізу рэк і каналаў, пра тое, што падае ўзровень вады ў калодзежах, быў атрыманы адказ: шлюзы на водных аб'ектах падымаюцца толькі на час пасяўной або ўборачнай кампаній.
Была закранута тэма добраўпарадкавання могілак і воінскіх пахаванняў. Дырэктар ААТ «Старыца-Агра» Уладзімір Рудакоўскі прапанаваў не браць плату з сельскагаспадарчага прадпрыемства за вываз смецця з могілак, бо яны па сваёй ініцыятыве дапамагаюць ЖКГ. Старшыня сельвыканкама Нэлі Гусева па пытанні рамонту помніка загінуўшым землякам у в. Слабада-Кучынка дала адказ, што да 9 мая 2022 г. усе неабходныя работы будуць зроблены.
Барыс Дзенісюк,
сябра ГА «Беларускі саюз журналістаў»