Спонсарскую дапамогу ў памеры шасці тысяч беларускіх рублёў Мінскі абкам галіновага прафсаюза работнікаў аховы здароўя вылучыў на ўмацаванне тэхнічнай базы: частка пайшла ў Капыльскую цэнтральную раённую бальніцу на куплю мабільнага транспартнага сродка, іншая - у Мядзельскую ЦРБ на новы апарат ЭКГ.
Уручыць ключы ад скутэра і перадаць сам транспартны сродак прыехалі галоўны ўрач ЦРБ Сяргей Пацейковіч і старшыня першаснай прафсаюзнай арганізацыі ўстановы аховы здароўя Людміла Лагун.
- Радыус абслугоўвання Камсамольскага ФАПа сапраўды вялікі - больш за 15 кіламетраў, і ўключае вёскі Сунаі, Петрылава, Камсамольская, пасёлкі Хвойнікі і Пукова, — кажа Сяргей Пацяйковіч. - Думаю, гэта нядрэнны падарунак да Новага года, які дазволіць скараціць адлегласць паміж населенымі пунктамі, зрабіўшы медработнікаў больш мабільнымі.
— Да гэтага ў мяне быў бензінавы скутэр, — адзначае загадчык ФАПа Таццяна Коўзун. - Яго мне ў 2010 годзе падарыў УП «ПрыортрансАгра», але ён ужо сваё адслужыў. Падарунку вельмі рада, бо ён дапаможа больш актыўна і хутка абслугоўваць маіх пацыентаў. А іх на ўчастку больш за 480 чалавек, у тым ліку 23 дзіцяці да трох гадоў і 6 — да года.
Да прыходу вясны жалезны конь выкарыстоўвацца не будзе, але як толькі ўсталюецца добрае надвор'е, загадчык ФАПам абавязкова апрабуе новы транспарт.
Таццяна БОХАН
