- Я сачу за грамадска-палітычным жыццём нашай краіны. І лічу, што змены ў асноўны закон проста неабходны і сам час дыктуе нам іх. Прыемна, што ў новым праекце Канстытуцыі забеспячэнне годнага ўзроўню і якасці жыцця грамадзян, умоў іх працы, прадастаўленне кожнаму працаздольнаму чалавеку магчымасці працаваць і ствараць свой дабрабыт захаваецца ў якасці адной з асноўных мэт сацыяльнай палітыкі беларускай дзяржавы. Грамадзянам краіны і далей будзе гарантавана права на працу як найбольш годны спосаб самасцвярджэння чалавека, гэта значыць права на выбар прафесіі, роду заняткаў і работы ў адпаведнасці з прызваннем, здольнасцямі, адукацыяй, прафесійнай падрыхтоўкай і з улікам грамадскіх патрэбнасцей, а таксама на бяспечныя ўмовы працы.
Далейшае развіццё нашай краіны залежыць ад кожнага з нас. Упэўнены, што ўсе жыхары нашага раёна прымуць актыўны ўдзел у рэферэндуме і зробяць правільны выбар у вырашэнні найважнейшых пытанняў дзяржаўнага і грамадскага жыцця Беларусі. Разам мы павінны вызначыць той шлях, па якім будзе развівацца наша краіна. Гэта вельмі важна.
Таццяна БОХАН