З года ў год ён радуе гасцей і жыхароў аграгарадка Семежава незвычайнымі элементамі карнавалу і народнай драмы, самабытным фальклорам і дэкаратыўна-прыкладным мастацтвам. А асаблівыя калядныя стравы нацыянальнай кухні, якімі маглі паласавацца ўсе прысутныя, у марозны дзень цешылі прыемным водарам. Сама ж гісторыя абраду сыходзіць каранямі ў XVIII стагоддзе, калі недалёка ад вёскі Семежава стаялі часткі царскай арміі. Як гаворыць мясцовае паданне, у дні святкавання Новага года па старым стылі (Юліянскі каляндар) салдаты і афіцэры хадзілі па дварах, паказваючы вясёлае прадстаўленне, за што гаспадары частавалі гасцінцамі. Пасля таго, як атрад пакінуў вёску, мясцовыя жыхары не толькі захавалі традыцыю, але і развілі яе ў рэдкае каляднае дзейства.
Ярка была аформлена цэнтральная сцэнічная пляцоўка. Па традыцыі для ўсіх гасцей і жыхароў аграгарадка былі падрыхтаваны тэматычныя гульні, бяспройгрышныя латарэі, выступалі роставыя лялькі, працавалі калядныя атракцыёны, ну і як жа без традыцыйных варожб, дзе кожны змог даведацца пра сваю будучыню. Была арганізавана выдатная выстава-продаж сувенірных вырабаў, падрыхтаваных раённым цэнтрам ткацтва і народным клубам «Скарбонка». У гэты дзень для турыстаў свае дзверы адчынілі Дом-музей Героя Беларусі Высоцкага Міхаіла Сцяпанавіча і раённы цэнтр ткацтва.
Самай яркай і ўражлівай стала тэатралізаваная частка свята «Цары запрашаюць», у якой паказалі сваё майстэрства прафесіяналы сваёй справы: працаўнікі РЦК, усіх сельскіх дамоў культуры і бібліятэк.
Як і належыць, у абрадзе ўдзельнічалі маладыя мужчыны і юнакі - «цары». Яны былі апрануты ў прыбраныя беласнежныя штаны і кашулі, на грудзях крыж-накрыж павязаны чырвоныя семежаўскія паясы з традыцыйным арнаментам. А на галаве ў іх - высокія шапкі, упрыгожаныя рознакаляровымі стужкамі. Кожны выконваў сваю ролю - лекара, барабаншчыка, механошы, цара Максіміліяна, цара Мамая, Дзеда і Бабы.
Пад суправаджэнне баяніста ўдзельнікі мерапрыемства ішлі па вясковай вуліцы, заходзілі ў сельскія дамы і разыгрывалі гісторыка-рэлігійную драму «Цар Максіміліян». У народзе вераць, што ў хаце, дзе пабывалі «цары», увесь год будуць мір, згода і багацце. Таму кожны з нецярпеннем чакаў незвычайных гасцей у прыгожых адзеннях, а з надыходам цемры «цары» запальвалі паходні.
Як адзначыла загадчыца Семежаўскага цэнтра культуры і вольнага часу Таццяна Шаўро, у ролі «Цара» хочуць паўдзельнічаць усе. А мясцовыя жыхары з вялікай радасцю чакаюць незвычайных герояў свята.
– Таццяна Сяргееўна і Іван Мікалаевіч Міхалковіч заўсёды рады «Царам», – усміхаючыся, адзначае Таццяна Шаўро. - Прычынай таму іх унукі Ігар і Максім Рамашко. Ігар нясе ганаровае званне Цар Максіміліян, а Максім - Цар-барабаншчык.
- Я ўжо пяты раз буду прымаць удзел у абрадзе, - кажа Ігар Рамашко. - Яшчэ ў школьныя гады мне прапанавалі стаць адным з герояў, і я, не разважаючы, пагадзіўся. А сёння для мяне ўжо традыцыя прыехаць у роднае Семежава і парадаваць родных і блізкіх.
Меркаванне
– Я ўпершыню знаходжуся на такім свяце, – з захапленнем кажа жыхарка горада Мінска Таццяна Уладзіміраўна. - Па сутнасці я ведаю і ўяўляю, што такое Каляды, як трэба шчадраваць, але такога не бачыла ніколі! Столькі людзей, усе ўсміхаюцца, запрашаюць спяваць і танчыць. Настрой на вышэйшым узроўні, з'яжджаць ад такіх добрых і пазітыўных людзей адназначна не хочацца. Эмоцыі перапаўняюць, а ў наступным годзе запрашу і родных наведаць гэта мерапрыемства.
Наталля Давыдзенка
Крыніца http://www.kopyl.by
