У працы Савета прыняў удзел і выступіў намеснік старшыні Рэспубліканскага Савета грамадскага аб'яднання «Беларускі саюз афіцэраў» палкоўнік у адстаўцы Васіль Скрыннікаў. Ён заклікаў членаў Беларускага саюза афіцэраў падтрымаць зварот Гродзенскай абласной арганізацыі - узяць актыўны ўдзел у рэспубліканскім рэферэндуме.
Старшыня абласнога Савета, які выступіў на паседжанні, палкоўнік у адстаўцы Уладзімір Белавусаў адзначыў, што большасці арганізацый БСА атрымалася захаваць колькасць на ранейшым узроўні, згуртаваць свае шэрагі, павысіць арганізаванасць і эфектыўнасць працы. Па выніках года лепшай арганізацыяй Беларускага саюза афіцэраў у групе «Б» прызнана Капыльская раённая (старшыня - старшы прапаршчык у адстаўцы Аляксандр Пякарскі), якой трэці раз запар уручаны Пераходзячы сцяг.
Рашэннем Рэспубліканскага Савета за значны ўклад у працу па арганізацыі ваенна-патрыятычнага выхавання насельніцтва, падрыхтоўку дапрызыўнай моладзі да вайсковай службы намеснік старшыні Савета раённай арганізацыі Барыс Дзенісюк узнагароджаны знакам «За актыўную працу» і граматай за актыўны ўдзел у рэспубліканскай акцыі «Беларускі саюз афіцэраў для краіны патрыётаў гадуе».
Складнікі поспеху - гэта згуртаваны калектыў афіцэраў, якія знаходзяцца на службе ва Узброеных Сілах, афіцэраў запасу і ў адстаўцы, якія штодня перадаюць моладзі свой вопыт і веды, выступаюць за захаванне галоўных каштоўнасцей беларускага грамадства - міру, стабільнасці і бяспекі на роднай зямлі. Сярод іх - начальнік адасобленай групы ваеннага камісарыята Нясвіжскага і Капыльскага раёнаў падпалкоўнік Сяргей Маргалік, старшыня РАС ДТСААФ маёр запасу Аляксандр Касінскі, старшыня РА ГА «Беларускі саюз ветэранаў вайны ў Афганістане» Уладзімір Лукашэвіч, палкоўнік у адстаўцы Алег Сівец, малалетні вязень фашызму капітан у адстаўцы Яўген Сівец, старшы лейтэнант запасу Антон Шышмароў і інш.
Дзейнасць раённай арганізацыі ажыццяўлялася ва ўзаемадзеянні з органамі дзяржаўнага і мясцовага кіравання, установамі адукацыі і культуры, прадпрыемствамі і грамадскімі арганізацыямі. Істотную інфармацыйна-прапагандысцкую падтрымку аказаў калектыў рэдакцыі газеты «Слава працы».
Наш кар.
Крыніца http://www.kopyl.by
