На тэрыторыі Беларусі створана 5510 участкаў для галасавання. У Брэсцкай вобласці - 883, Віцебскай - 714, Гомельскай - 977, Гродзенскай - 608, Мінскай - 929, Магілёўскай - 707, Мінску - 692. 217 участкаў - у санаторыях, прафілакторыях, дамах адпачынку, бальніцах і іншых арганізацыях аховы здароўя, у стацыянарных умовах, 12 - у воінскіх часцях.
Участкі для галасавання адкрыты з 10.00 да 14.00 і з 16.00 да 19.00. Афіцыйнага пацверджання прычын, па якіх чалавек не можа прагаласаваць у асноўны дзень, не трэба. Пры сабе выбаршчыку трэба мець пашпарт. Бюлетэнь выдаецца таксама пры прад'яўленні ваеннага білета (для ваеннаслужачых тэрміновай службы), службовага пасведчання работніка дзяржоргана (арганізацыі), правоў кіроўцы. Прагаласаваць можна і па пенсіённым пасведчанні, пасведчанні інваліда (пры наяўнасці фатаграфіі), студэнцкім білеце. Калі выбаршчык страціў пашпарт ці яго скралі, то на ўчастак яму трэба ўзяць з сабой даведку з органаў унутраных спраў, якая пацвярджае асобу грамадзяніна.
На рэферэндум вынесена адно пытанне: ці прымаеце вы змяненні і дапаўненні Канстытуцыі Рэспублікі Беларусь?
Паставіць сваю адзнаку ўдзельнікі рэферэндуму павінны будуць у адным з двух квадратаў, адпаведна «за» і «супраць». Прычым знак у адным з квадратаў можна ставіць абсалютна любы. Калі адзнака будзе пастаўлена ў двух квадратах або не будзе пастаўлена ні ў адным, то такі бюлетэнь будзе прызнаны несапраўдным.
Рэферэндум праводзіцца шляхам усеагульнага, свабоднага, роўнага і тайнага галасавання. Права ўдзельнічаць у ім маюць грамадзяне, якія дасягнулі 18 гадоў. Кожны ўдзельнік рэферэндуму галасуе асабіста.
Рэферэндум лічыцца адбыўшымся, калі ў ім узялі ўдзел больш за палову грамадзян, унесеных у спісы для галасавання.
Крыніца http://www.kopyl.by