— Людміла Іванаўна, што, на Вашу думку, з'яўляецца найважнейшым для дэпутата парламента?
- Самае галоўнае - бачыць вынік сваёй працы. Магчыма, маё меркаванне занадта суб'ектыўна, але я лічу, што ў любой справе важны вынік. У дэпутацкай дзейнасці ён часам расцягнуты ў часе, тым больш прыемна, калі бачыш, што ўдалося камусці дапамагчы або рэалізаваць прапановы, у тым ліку ініцыяваныя грамадзянамі.
— Рост дабрабыту людзей магчымы, як вядома, толькі на трывалым эканамічным падмурку. Якія заканадаўчыя рашэнні, на Ваш погляд, асабліва значныя для эканомікі?
— У 2021 годзе дэпутатамі прынята 46 законапраектаў у першым чытанні, 59 — у другім. Эканамічны блок займае дастаткова вялікую ўдзельную вагу ў агульным пакеце прынятых законапраектаў. Як старшыня Пастаяннай камісіі па бюджэце і фінансах перш за ўсё не магу не адзначыць, што ўсе 10 законапраектаў названай камісіі якраз і рэгулююць эканамічныя адносіны ў краіне. Важна падкрэсліць, што нягледзячы на складанасць фарміравання бюджэт 2022 года захоўвае сваю сацыяльную накіраванасць, важныя пытанні ў плане ўдасканалення падаткаабкладання закладзены пры карэкціроўцы падатковага кодэкса, унесены змяненні ў законы «Аб інвестыцыях», «Аб спажывецкай кааперацыі», «Аб змяненні законаў па пытаннях працоўных. адносін», «Аб змене законаў па пытаннях супрацьдзеяння экстрэмізму» і інш.
- Як вядома, у цэнтры ўвагі заканадаўцаў знаходзіцца звычайны, просты чалавек. Што Вы адзначыце ў прававых навінах сацыяльнага характару мінулага года?
— Унесены змены ў Кодэкс «Аб адукацыі». Дакумент рыхтаваўся даўно, ён чаканы. Капыльскія педагогі таксама ўносілі свае прапановы, я думаю, яны знойдуць адказы на свае пытанні, узнятыя падчас круглага стала, які прайшоў з маім удзелам у мінулым годзе. Унесены змяненні ў законы «Аб турызме», «Аб масавых мерапрыемствах у Рэспубліцы Беларусь», «Аб свабодных эканамічных зонах», «Аб змяненні кодэксаў па пытаннях крымінальнай адказнасці» і інш.
- Найважнейшы ўчастак працы парламентарыя - выбарчая акруга, дзе людзі добра ведаюць Вас па дэпутацкіх справах. І ўсё ж нагадайце, што зроблена для выбаршчыкаў за мінулы час.
— Мінулы год для жыхароў Капыля, ды і раёна ў цэлым, стаў знакавым. Я мяркую, ён увойдзе не толькі ў гісторыю Капыльшчыны, але і Рэспублікі Беларусь як месца правядзення XXVIII Дня беларускага пісьменства, а таксама абласных Дажынак.
Затрачана шмат рэсурсаў на аднаўленне інфраструктуры горада і раёна. Нягледзячы на тое, што работы вяліся ў планавым парадку, многія жыхары прыходзілі да мяне са зваротамі і прапановамі.
Напрыклад, па просьбе жыхароў урэгулявана пытанне водазабеспячэння на вуліцы Пралетарскай, зроблены рамонт прыступак перад пад'ездамі і абсталявана стаянка для аўтамабіляў, дзіцячая пляцоўка каля дома № 41 па вуліцы Пралетарскай, вырашана пытанне з гарачай вадой і ацяпленнем дома № 6 па вуліцы Багдановіча, аказана садзейнічанне ў выдзяленні фінансавых рэсурсаў на рамонт стадыёна і будынка СШ №2 г. Капыля, цэнтральнай раённай бальніцы.
— Як вядома, падрыхтоўка да маштабных мерапрыемстваў прайшла непасрэдна з Вашым удзелам.
- Так, сапраўды гэта так. Гісторыя гэтага пытання пачалася задоўга да 2021 года, практычна з моманту майго абрання ў 2016 годзе дэпутатам Палаты прадстаўнікоў шостага склікання. Сумна было глядзець на свой родны горад, і абяцанне дапамагчы яго абнаўленню, прыцягнуць увагу да гэтага цудоўнага беларускага мястэчка было адным з пунктаў маёй перадвыбарнай праграмы. Мне вельмі пашанцавала знайсці падтрымку ў асобе тагачаснага старшыні райвыканкама Анатоля Ліневіча ў прасоўванні на розных узроўнях гэтага пытання і дабіцца, каб ужо ў 2019 годзе было прынята рашэнне аб правядзенні ў 2021 годзе дадзенага мерапрыемства. І ў мяне сёння, напэўна, выключная магчымасць падзякаваць усім, хто падтрымаў гэту ініцыятыву і прыняў непасрэдны ўдзел у падрыхтоўцы і правядзенні свята. Жадаецца толькі выказаць просьбу і пажаданне жыхарам і прадстаўнікам мясцовых органаў улады берагчы створанае і не спыняцца на дасягнутым.
— Людміла Іванаўна, якія ўражанні застаюцца ў Вас пасля наведвання родных мясцін, пасля сустрэч з землякамі?
- Калі казаць адкрыта, як у любога чалавека ў залежнасці ад сітуацыі розныя. Але я думаю, што капыляне бачаць на прыкладзе свайго горада, як шмат зроблена і робіцца ў нас у краіне па падтрымцы і развіццю рэгіёнаў, малых гарадоў, сацыяльнай падтрымцы насельніцтва, развіццю патэнцыялу моладзі. Пытанні і запыты ў людзей розныя, але кожны паасобку і ўсе мы разам хочам для сваіх дзяцей, унукаў яшчэ лепшай будучыні. Усё ў нашых руках. Таму ў сувязі з надыходзячай вельмі важнай палітычнай падзеяй — рэферэндумам — запрашаю ўсіх грамадзян прыйсці і прагаласаваць за будучыню сваёй краіны.
Беседаваў Сяргей КОЗЕЛ
Крыніца http://www.kopyl.by