Так, сярод устаноў і арганізацый сістэмы камітэта за найлепшае выкананне асноўных паказчыкаў развіцця сацыяльна-працоўнай сферы ў 2021 трэцяе месца заваявала ўпраўленне па працы, занятасці і сацыяльнай абароне Капыльскага райвыканкама.
Капыльскі ТЦСАН заўсёды знаходзіцца ў тройцы лідэраў. Чарговыя дасягненні — тры Дыпломы камітэта па працы, занятасці і сацыяльнай абароне Мінаблвыканкама — за лепшую ўстанову сацыяльнага абслугоўвання па добраўпарадкаванні, азеляненні і санітарным утрыманні тэрыторый, за арганізацыю работы па забеспячэнні даступнага асяроддзя для людзей з інваліднасцю, а таксама ў намінацыі «Тэрыторыя сацыяльнай актыўнасці» па выніках 2021 года.
- Дадзеныя дасягненні - гэта перамога і заслуга ўсяго калектыву, - дзеліцца дырэктар ТЦСАН Святлана Маліноўская. - Гэта ацэнка нашай плённай працы. А зрабілі мы нямала: распрацаваны новыя метадычныя матэрыялы і дапаможнікі, праектныя дакументы і буклеты, вывучаны многія нарматыўныя дакументы. Мы адны з першых адкрылі пакой па доглядзе цяжкахворых і распаўсюдзілі гэты вопыт на ўсю рэспубліку ў рамках пасяджэння Рэспубліканскага метадычнага савета па развіццю сістэмы сацыяльнага абслугоўвання. На дасягнутым не спыняемся, а значыць, важныя перамогі яшчэ наперадзе.
Кіраўніком камітэта Тамарай Красоўскай быў адзначаны высокі ўзровень працы ўстаноў сацыяльнага абслугоўвання Міншчыны за мінулы год. Прыярытэтамі ў рабоце сістэмы сацыяльнай абароны на наступны перыяд стануць наступныя пытанні: рост даходаў насельніцтва, садзейнічанне эфектыўнай занятасці насельніцтва, удасканаленне пенсіённай сістэмы і мер падтрымкі сем'яў, якія выхоўваюць дзяцей. Не менш важным з'яўляюцца развіццё сістэмы дзяржаўнай адраснай сацыяльнай дапамогі, устаноў сацыяльнага абслугоўвання і сацыяльных паслуг, забеспячэнне даступнага асяроддзя для людзей з інваліднасцю.
Паколькі Капыльскі ТЦСАН з'яўляецца рэсурснай пляцоўкай па метадычным суправаджэнні дзейнасці нестацыянарных устаноў сацыяльнага абслугоўвання Мінскай вобласці, то на калегіі Святлана Маліноўская таксама прэзентавала інтэрнэт пляцоўку па працы з сям'ёй - семья.by.
— На інфармацыйным рэсурсе сабраны ўсе сацыяльныя гарантыі для сем'яў, якія выхоўваюць непаўналетніх дзяцей, — расказвае Святлана Станіславаўна. — У працы са шматдзетнымі (а менавіта для іх першапачаткова ствараўся гэты партал. — Аўт.) мы сутыкнуліся з тым, што для таго, каб сям'я атрымала актуальную інфармацыю аб сваіх ільготах і гарантыях, ім неабходна вывучыць інфармацыю ў розных крыніцах (няхай гэта будзе сайты ўстаноў і арганізацый, буклеты, нарматыўныя дакументы,). А гэта вельмі няёмка.
Таму на семья.by можна атрымаць інфармацыю аб сваіх сацыяльных гарантыях з аднаго рэсурса. Пакуль гэта пляцоўка распрацавана на прыкладзе Капыльскага раёна. Але мы прапануем, каб заходзячы на інфармацыйны рэсурс, сям'я магла б выбраць свой рэгіён і атрымаць цікавую для яго інфармацыю. Прыемна, што на калегіі інтэрнэт-пляцоўка атрымала дастаткова высокую ацэнку. Спадзяемся, што інфармацыйная пляцоўка семья.by будзе дапрацавана і ўкаранёна для шырокага карыстання, бо праект важны для будучай паспяховай работы сістэмы сацыяльнага забеспячэння.
Таццяна Бохан
Крыніца http://www.kopyl.by
