Думаю, многія з нас не раз чулі: «Не жаночая гэта справа - пагоны на плячах насіць». Аднак знойдуцца свае аргументы на карысць таго, як выразна выконваць свае службовыя абавязкі і пры гэтым заставацца абаяльнай жанчынай і любячай маці.
Дарэчы, па выніках працы за мінулы год яна стала лепшым следчым Мінскай вобласці.
Шлях у прафесію
У школьныя гады Надзея была актыўнай і дапытлівай вучаніцай з шырокім колам інтарэсаў. У тую пару, калі перад чалавекам на парозе сталення адчынены сотні дарог, цяжка абраць адну-адзіную. Мусіць, пачуццё справядлівасці, узнаўлення яе ў гэтым міры падштурхнула дзяўчыну ў старэйшых класах абраць Акадэмію МУС і ў наступным працаваць следчым. У прафесіі Надзея ўжо больш за дзесяць гадоў. І, як яна сама адзначае, ні кроплі не шкадуе.
На працы - следчы…
Галоўная задача следчых - усебакова, аб'ектыўна і аператыўна расследаваць злачынствы, абараняць правы і законныя інтарэсы грамадзян і дзяржавы. І калі ахарактарызаваць тыповы партрэт злачынца, то, на думку старэйшага следчага Драбушэвіч, усё залежыць ад складу злачынства. Напрыклад, асобы, якія ўчынілі крадзяжы.
- Я б сказала, што за час маёй працы да дадзенай катэгорыі ставяцца грамадзяне сярэдняга ўзросту, непрацуючыя, якія злоўжываюць спіртнымі напоямі, - распавядае маёр юстыцыі. - Як правіла, раней неаднаразова судзімыя, якія не знаходзяць нічога лепшага, як зноў ступіць на «крывую» дарожку. Лічу, што фраза з фільма «Джэнтльмены поспеху»: «Выкраў, выпіў – у турму!», – як раз адлюстроўвае сутнасць паводзінаў злачынцы. Пра некаторыя крымінальныя справы следчаму даводзіцца думаць і пасля заканчэння працоўнага часу: не даюць спакою некаторыя ідэі, думкі, следчыя дзеянні, бо за кожнай крымінальнай справай - нечы лёс.
- Калі ўнікаеш у абставіны здзейсненага злачынства, бывае шкада не толькі пацярпелых, але часам і падазраваных, так як злачынства можа быць здзейснена з прычыны збегу акалічнасцяў, па неасцярожнасці і г.д., - працягвае следчы. - Кожную гісторыю прапускаеш «праз сябе». У такія моманты важна памятаць, што ты знаходзішся на службе, пакідаць эмоцыі і выразна выконваць сваю працу ў адпаведнасці з законам.
Калі гаворка заходзіць пра сям'ю, праніклівы погляд Надзеі становіцца мякчэй. Вольнага часу ў маёй суразмоўніцы менш, чым хацелася б, але ўсё ж такі знаходзіць час для хатніх клопатаў. «Святымі» днямі лічыць выхадныя: па традыцыі для чатырохгадовай дачушкі рыхтуе смачныя аладкі і каўбаскі на мангале з бульбяным пюрэ. - Увесь вольны час імкнуся надаваць сваёй дачцэ Ясеніі, - працягвае Надзея. - Разам наведваем басейн, ходзім на прагулкі, любуемся прыродай, такім чынам яшчэ і ўмацоўваем здароўе. Сямейныя святы - гэта заўсёды імпрэза: з сястрой і братам збіраемся ў бацькоўскай хаце за святочным сталом.
Поспех залежыць не ад полу
- Быць жанчынай у следчым аддзеле нялёгка - гэта праўда, - адзначае Надзея. - Даводзіцца несці службу нароўні з мужчынамі, і попыт з цябе адпаведны. Але лічу, што поспех залежыць не ад полу, а ад таго, наколькі чалавек гатовы аддаць сябе справе. Тут важна быць працавітым, настойлівым, смелым, граматным, трэба ўмець правільна планаваць працу - і тады з усім можна справіцца.
Таццяна Бохан
крыніца http://www.kopyl.by
