Ужо ў фае раённага цэнтра культуры, дзе праходзіла мерапрыемства, адчувалася атмасфера свята. Былі прадстаўлены ўзнагароды розных прадпрыемстваў і арганізацый раёна, якія сведчылі аб тым, што нам ёсць пра што расказаць і кім ганарыцца. Ледзь наводдаль даўно ўпадабаная і заваяваўшая давер спажыўцоў прадукцыя, а таксама навінкі вытворчасці Капыльскага філіяла ААТ «Слуцкі сыраробны камбінат», райспажыўтаварыства і кааппрама. Асаблівую цікавасць выклікала друкаваная прадукцыя, вырабленая ў вытворчым аддзеле рэдакцыі газеты «Слава працы», а таксама персанальная выстава дэкаратыўна-прыкладной творчасці настаўніка Цэнтра творчасці дзяцей і моладзі Капыльскага раёна Ірыны Дуброўскай.
З працоўнымі поспехамі перадавікоў сфер дзейнасці павіншаваў старшыня райвыканкама Сяргей Пілішчык. Ён нагадаў аб прыкметных поспехах, дасягнутых у раёне летась, і выказаў упэўненасць, што добрасумленная праца, граматнае выкананне службовых абавязкаў стануць трывалай асновай для выканання намечаных планаў, павышэння якасці жыцця і дабрабыту людзей.
Словы падзякі працаўнікам Капыльшчыны адрасаваў старшыня камітэта па сельскай гаспадарцы і харчаванні Мінаблвыканкама Васіль Сысоеў:
– Калі ахарактарызаваць вынікі рэгіёна двума ёмістымі словамі, то гэта стабільнасць ва ўсім і прафесіяналізм вашых кадраў. Вынікі, якія дэманструюць сёння сельскагаспадарчыя прадпрыемствы Капыльшчыны, цешаць. А работа, якая праводзіцца ў вашых сельгаспрадпрыемствах па будаўніцтве новых сучасных комплексаў з самымі лепшымі ўмовамі ўтрымання дойнага статка, - варта самай высокай ацэнкі. Ёсць і перспектыва па вытворчасці і рэалізацыі малака: вы амаль дасягнулі надою 6 тысяч кг малака ад каровы, як і вобласць, якая сёлета перасягнула шасцітысячную мяжу.
На злёце перадавікоў адданым сваёй справе прафесіяналам, лепшым працоўным калектывам і працаўнікам уручылі мноства ўзнагарод. Гэта радуе і захапляе: чалавек працы варты падзякі.
За бездакорную працу, узорнае выкананне службовых абавязкаў Падзякай старшыні Палаты прадстаўнікоў Нацыянальнага сходу Рэспублікі Беларусь былі ўзнагароджаны настаўнік Слабадакучынскай СШ Барыс Дзенісюк і настаўнік рускай мовы і літаратуры СШ № 2 г. Капыля.
Ганаровая грамата Мінаблвыканкама была ўручана медыцынскай сястры (старэйшай) тэрапеўтычнага аддзялення Капыльскай ЦРБ Ніне Стралене. А лепшыя прадстаўнікі сваёй сферы дзейнасці таксама атрымалі Падзяку старшыні Мінаблвыканкама. Сярод іх – загадчыца Пацейкаўскага ФАПа Людміла Козел, настаўнік рускай мовы і літаратуры СШ № 3 г. Капыля Таццяна Нядзелька, настаўнік працоўнага навучання Цімкавіцкай СШ Ганна Фёдаравіч, загадчыца аддзялення забеспячэння дзённага знаходжання інвалідаў і грамадзян пажылога ўзросту Капыльскага ТЦСАН Ірына Рай, намеснік дырэктара па вучэбна-вытворчай рабоце Капыльскага дзяржаўнага каледжа Таццяна Астрэйка.
Старшыня камітэта па сельскай гаспадарцы і харчаванні Мінаблвыканкама Васіль Сысоеў з узнагароджанымі
Многія працаўнікі былі ўдастоены ўзнагарод ад Мінскага абласнога камітэта Беларускага прафесійнага саюза работнікаў АПК. Па шматгадовай традыцыі ўсіх прысутных на свяце павіншавалі прадстаўнікі дэлегацый суседніх раёнаў - Нясвіжскага, Клецкага і Уздзенскага.
У падарунак людзі працы атрымалі песні і танцы ад таленавітых вакалістаў і творчых калектываў устаноў культуры Капыльшчыны. Павіншаваць працаўнікоў прыехаў і вядомы беларускі гурт «Дразды» і яго нязменны лідэр Віталь Карпанаў. Як кажуць, рукам праца – душы свята…
Уражаннямі аб злёце перадавікоў падзяліліся яго ўдзельнікі і госці.
Першы намеснік старшыні Клецкага райвыканкама - начальнік упраўлення па сельскай гаспадарцы і харчаванні райвыканкама Мікалай ГАЛУБОВІЧ:
– Прыемна знаходзіцца ў сваіх суседзяў, радавацца іх дасягненням і поспехам. Усё, што робіцца на капыльскай зямлі, мы ведаем і пераймаем досвед. Толькі вялікай працай можна дасягнуць поспехаў у сваёй справе, а вашы працаўнікі самааддана працуюць, каб раён быў багатым і квітнеючым.
Намеснік старшыні Уздзенскага райвыканкама Вадзім КАЖАМЯКА:
– Капыльская зямля заўсёды славілася гасціннымі, адкрытымі, працавітымі і таленавітымі людзьмі, якія памнажаюць слаўныя традыцыі тых, хто стаяў ля вытокаў гісторыі раёна. І гэты святочны дзень - яркае таму пацвярджэнне. Колькасць узнагароджаных уразіла, гэта значыць, што іх працу паважаюць і шануюць, і гэта адчувалася.
Міхаіл Бода ўзнагароджвае Наталлю Язэпенка
Спецыяліст па нарыхтоўцы сыравіны Капыльскага філіяла ААТ «Слуцкі сыраробны камбінат» Наталля ЯЗЭПЕНКА:
- Быць у ліку ўзнагароджаных - адказна і ганарова. Думаю, што сярод маіх калег кожны мог быць удастоены такой узнагароды, бо ў якасці працы нашых адмыслоўцаў можна быць упэўненым. Як вынік - прадукцыя нашага філіяла з года ў год дэманструе цудоўную якасць прадуктаў.
Настаўнік рускай мовы і літаратуры СШ № 2 г. Капыля Ніна СКРЫПІНСКАЯ:
- Што адчуваеш, прысутнічаючы на злёце перадавікоў? Гонар за нашу капыльскую зямлю, на якой працуюць такія годныя людзі. Дзіўная цёплая атмасфера, панаваўшая ў зале. За час сваёй педагагічнай дзейнасці я цвёрда засвоіла адно простае правіла: настаўнік павінен удасканальвацца, увесь час вучыцца сам, інакш ён перастае быць настаўнікам. Узначальваючы на працягу многіх гадоў раённае метадычнае аб'яднанне настаўнікаў рускай мовы і літаратуры, я бачу, колькі таленавітых, крэатыўных, творчых настаўнікаў працуе ў раёне. І так прыемна аказацца сярод узнагароджаных. Гэтак высокая ўзнагарода ўражвае і абавязвае працаваць яшчэ лепш. Бо ў руках настаўніка, як бы пышна гэта не гучала, будучыня нашай краіны.
Таццяна Бохан
Фота Наталлі ДАВЫДЗЕНКА
«СП»