Каментуе галоўны спецыяліст раённай інспекцыі прыродных рэсурсаў і аховы навакольнага асяроддзя Андрэй ЦВІРКО:
– З надыходам вясны пасля сходу снежнага покрыва на тэрыторыі рэспублікі, як правіла, узнікае вельмі складаная пажаранебяспечная абстаноўка. Паўсюдна ўздоўж аўтамабільных дарог і чыгунак, на лугах, узлесках лесу дапушчаецца выпальванне леташняй сухой травы, на палях спальваецца іржышча, пажніўныя рэшткі, сцірты з саломай, разводзяцца вогнішчы і спальваецца смецце, што ў шэрагу выпадкаў прыводзіць да ўзнікнення пажараў у лясах і на тарфяніках. Штогод 10-12% лясных пажараў узнікае з прычыны правядзення веснавых выпальванняў.
Устаноўлена, што ў выніку выпальвання сухой расліннасці згараюць не толькі сухія травы, але і карысныя расліны, пашкоджваецца іх каранёвая сістэма, агнём знішчаецца насенне і карысная фауна. У верхніх пластах глебы (5-10 см) утрымоўваецца каля 90% расліннай і жывёльнай разнастайнасці лугавых экасістэм, таму прыродзе наносіцца незаменная шкода. У агні гінуць не толькі расліны, у полымі гінуць жывёлы, птушкі, казуркі і мікраарганізмы. Выпальванне сухой расліннасці выклікае гібель кладак і месцаў гнездзішчаў крыжанкі, чыбіса, бакаса, аўсянкі, жаўрука і іншых птушак, гнездавы перыяд якіх пачынаецца ў пачатку красавіка. Працэс гарэння суправаджаецца таксама выкідам у атмасферу вуглякіслага газу, згарае кісларод. У агні згараюць рэшткі ўгнаенняў і ядахімікатаў, утвараючы таксічныя злучэнні. Пры спальванні травы каля аўтадарог у паветра паднімаюцца цяжкія металы і прадукты распаду радыёактыўных элементаў. Правядзенне выпальванняў часта прыводзіць да ўзгарання тарфянікаў і лясных масіваў, знішчаючы каштоўныя пароды драўніны, выклікаючы гібель дзікіх звяроў і птушак, ягаднікаў і грыбніц.
Адначасова трэба памятаць, што ў адпаведнасці з артыкулам 16.40 Кодэкса Рэспублікі Беларусь аб адміністрацыйных правапарушэннях выпальванне сухой расліннасці, траў на пні, а таксама іржышча і пажніўных астаткаў на палях або непрыняцце мер па ліквідацыі выпальванняў цягне накладанне штрафу ў памеры ад 10 да 30 базавых велічынь. А вось за парушэнне правілаў абыходжання з адходамі, у тым ліку іх несанкцыянаванае спальванне, цягне накладанне штрафу ў памеры да 50 базавых велічынь і матэрыяльную адказнасць (кампенсацыя прычыненай шкоды навакольнаму асяроддзю).
Аднак, на вялікі жаль, ёсць выпадкі безадказнага стаўлення некаторых грамадзян і службовых асоб прадпрыемстваў і арганізацый раёна да прыроднага асяроддзя. Не задумваючыся аб наступствах, яны падпальваюць усюды сухую траву, выпальваюць пажніўныя рэшткі і наносяць незаменную шкоду прыродзе.
Таццяна Бохан
крыніца http://www.kopyl.by
Фота мае ілюстрацыйны характар.
