У сям'і Надзеі і Сяргея Чарных выхоўваюцца пяцёра дзяцей. Яна – кіраўнік хору храма Ушэсця Гасподняга ў г. Капылі, цяпер знаходзіцца ў водпуску па доглядзе дзіцяці ва ўзросце да трох гадоў. Кіраўнік сямейства з'яўляецца протаіерэем Слуцкай епархіі, пробашчам Парафіі Кафедральнага сабора ў гонар Нараджэння Хрыстова г. Салігорска. Самаму старэйшаму сыну Серафіму хутка 20 гадоў. Ён вучыцца ў Мінскай духоўнай семінарыі. Дачка Ксенія - у Гродзенскім медыцынскім універсітэце: хоча стаць педыятрам. Філіп і Фёдар яшчэ школьнікі. Настаўнікі і аднакласнікі адклікаюцца аб іх як аб працавітых і прыязных вучнях, бо да любой справы ці даручэння падыходзяць з вялікай адказнасцю. А самаму малодшаму - Прохару - летам будзе два. Дзеці выхоўваюцца ў атмасферы кахання, клопату і паразумення.
- Што можа быць лепш за шчаслівыя дзіцячыя вочы і ўсмешкі? У мацярынстве - мая місія, - дзеліцца ўражаннямі Надзея Сяргееўна. - Таму сённяшняя ўзнагарода - ордэн Маці - асабліва прыемная. Для нас зладзілі цудоўнае свята. Віншуючы жанчын з атрыманнем узнагарод, намеснік старшыні Мінаблвыканкама сказаў цёплыя словы ў адрас усіх маці, падзякаваў нам за такую важную і адказную працу. Усе мамы рады і ганарацца, што так высока адзначаны. Шчаслівая і я! Бо гэта не толькі мой ордэн, але і заслуга ўсёй маёй сям'і.
ДАРЭЧЫ!
Сёння ў Капыльскім раёне пражывае 397 шматдзетных сем'яў. У 38 сем'ях выхоўваецца пяць і больш дзяцей. З іх у 26 сем'ях – пяцёра, у дзевяці - шасцёра, у трох - сямёра. 70 жанчын узнагароджаны ордэнамі Маці.
Таццяна Бохан
Крыніца http://www.kopyl.by