Аб асноўных праблемах наркаманіі мы гутарым з урачом псіхіятрам-нарколагам Капыльскай ЦРБ Аляксандрам ГАЙДЗЕЛЕМ.
– Аляксандр Іосіфавіч, раскажыце, што адбываецца з чалавекам, ужываючым наркотыкі?
- Ужыванне наркотыкаў губіць не толькі цела чалавека, але і яго душу. Наступствы наркаманіі страшныя як для фізічнага стану чалавека, так і для псіхікі. На першых этапах далучэння да наркатычных рэчываў у людзей пераважаюць афектыўныя парушэнні, гэта значыць адбываецца павелічэнне адчувальнасці, назіраецца схільнасць да эмацыйнай хісткасці і неадэкватных рэакцый на тое, што адбываецца вакол іх. У наркаманаў назіраюцца дэпрэсіўнасць, ілжывасць, страта пачуцця абавязку і самакрытыкі. Яны перастаюць рэальна ацэньваць небяспеку наступстваў наркаманіі.
– Да якіх сацыяльных наступстваў можа прывесці наркаманія?
- Ужыванне наркотыкаў прыводзіць да вялізнага ліку цяжкасцяў і тупіковых сітуацый для самога хворага. Яны праяўляюцца пасля першай дозы наркотыку. Чалавек трапляе ў зусім іншы свет, дзе няма ніякіх клопатаў і трывог, але гэта ненадоўга. Далей адбываецца псіхалагічная нестабільнасць, дэпрэсіі, пастаянныя ломкі, галаўны боль, гніюць зубы, выпадаюць валасы, з'яўляецца хранічны кашаль, імпатэнцыя. Цела чалавека пачынае гніць. У сацыяльным плане наркамана чакае поўны крах. Яго асабістае жыццё, сям'я развальваюцца, працаваць ён ужо не ў стане. Большасць нарказалежных адмаўляюць той факт, што яны ўжо трапіліся на «кручок» наркотыкаў, а навакольныя на іх перастаюць рэагаваць.
– Якімі могуць быць медыцынскія наступствы?
- Самымі распаўсюджанымі з'яўляюцца інфекцыі, якія з'яўляюцца з-за адсутнасці гігіены падчас ін'екцыі, - гепатыты В і С, заражэнне крыві, СНІД. Амаль ва ўсіх наркаманаў павялічана і хварэе печань, назіраюцца парушэнні ў рабоце дыхальнай, сардэчна-сасудзістай, эндакрыннай, нервовай і вылучальнай сістэм. Сярэдні ўзрост, у якім гінуць наркаманы, - 36 гадоў.
– Раскажыце аб прычынах спажывання наркатычных рэчываў.
– Самымі распаўсюджанымі з'яўляюцца ўнутраныя праблемы (непрыемнасці, сацыяльная няроўнасць, неразуменне ў сям'і) і, вядома ж, цікаўнасць. Многія думаюць, што гэта модна, што хаця б раз у жыцці трэба ўсё паспрабаваць. Менавіта гэта з'яўляецца вялізнай памылкай. Таксама нарказалежныя знаходзяцца ў пошуку новых адчуванняў, хочуць самазацвердзіцца і здавацца дарослымi.
– Па якіх прыкметах можна распазнаць наркамана?
– У чалавека, які ўжываў наркотыкі, пашыраюцца зрэнкі, назіраецца затарможаная рэакцыя, неадэкватныя паводзіны. Наркаманы са стажам занадта знясілены, колер твару набывае нездаровае зямлістае адценне. Рэзкі збой у вучобе ў падлеткаў, замкнёнасць, павышаная нервовасць, раздражняльнасць, канфліктнасць. Асобы, якія ўжываюць наркотыкі опіўмнай групы, як правіла, выглядаюць старэй за свае гады. Пры ўжыванні прэпаратаў групы опію характэрны паскораная гаворка, ажыўленасць, растарможанасць, зніжэнне крытычнай адзнакі ўчынкаў. Пры перадазаванні - затарможанасць, дрымотнасць, аглушэнне. Для ўжываючых прэпараты канабіс (каноплі) і так званага спайса ўласцівы парушэнні каардынацыі рухаў, хады, дрыгаценне рук, пачырваненне твару або ненатуральная бледнасць, пашырэнне зрэнак. Пасля прыёму какаіну з'яўляецца павышаная актыўнасць у рухальных працэсах. Наркаманы шмат рухаюцца, сыходзяць з дому, хаатычна блукаюць. Праз 2-3 гадзіны надыходзіць заняпад сіл, апатыя, сутаргавыя прыпадкі, глядзельныя і слыхавыя галюцынацыі, пры гэтым чалавек знаходзіцца ў прыпаднятым стане. Асобы, якія спажываюць эфедрон і первітын, маюць знясілены выгляд, выглядаюць старэй за свой узрост. Вочы запалыя з цёмнымі кругамі, скурныя пакровы сухія, вельмі бледныя з шэраватым адценнем. Пры ап'яненні назіраецца бессэнсоўная мітуслівасць, рухомасць. Праз 3-4 гадзіны ўзбуджаны стан змяняецца млявасцю, дрымотнасцю, знікае апетыт.
Атрымаць кансультацыю можна ў паліклініцы УАЗ «Капыльская ЦРБ» (кабінет № 223) або па тэлефоне 51-7-62.
Наталля Давыдзенка
Крыніца http://www.kopyl.by
