Гаворка ідзе аб добраўпарадкаванні, навядзенні парадку і правядзенні неабходных работ па рамонце мемарыялаў і помнікаў вайсковай славы, адзіночных і брацкіх магіл воінаў, якія загінулі ў гады Першай сусветнай і Вялікай Айчыннай, а таксама пры выкананні інтэрнацыянальнага доўгу, воінскіх могілак і асобных воінскіх участкаў агульных могілак, месцаў масавых пахаванняў грамадзянскага насельніцтва. Згодна з рашэннем, дадзеныя работы даручана арганізаваць кіраўнікам арганізацый (прадпрыемстваў), устаноў раёна, замацаваных за памятнымі знакамі.
Навядзенне парадку ўжо пачалося. Так, у рамках Міжнароднага дня вызвалення вязняў фашысцкіх канцлагераў навучэнцы і педагогі Ванелевіцкай СШ разам са старшынёй і членамі першаснай ветэранскай арганізацыі ААТ «Піянер-Агра» Ганнай Аляксееўнай Торык высадзілі сімвалічныя тры туі каля брацкай магілы.
- Няма ў Беларусі такой сям'і, якую б не закранула вайна. Кожны загінуўшы камусці быў бацькам ці маці, мужам або жонкай, сынам ці дачкой, братам ці сястрой. Толькі тры дрэўцы нібы жывыя людзі. Кожны трэці... У полымі той вайны загінуў кожны трэці жыхар Беларусі — адзначыла Ганна Аляксееўна.
А вось члены першаснай арганізацыі РГА «Белая Русь» Капыльскага сельвыканкама ў рамках рэспубліканскага суботніка добраўпарадкоўвалі брацкую магілу жыхароў в. Дусаеўшчына, жыўцом спаленых фашыстамі ў лютым 1943 года.
На тэрыторыі Грозаўскага сельсавета работнікі і пражываючыя ў Грозаўскім псіханеўралагічным доме-інтэрнаце для састарэлых і інвалідаў наводзілі парадак каля брацкай магілы ў в. Канюхі.
Сяргей Козел
Крыніца http://www.kopyl.by