Сярод удзельнікаў-фіналістаў — выхавацель групы падоўжанага дня СШ № 2 г. Капыля Паліна Акінчыц, выхавацель ясляў-сада № 3 г. Капыля Кацярына Путрыч, настаўнік пачатковых класаў Ванелівіцкай СШ Карына Саміла, настаўнік англійскай мовы СШ № 3 г. Капыля Крысціна Саладуха і настаўнік пачатковых класаў Гразоўскага КПК д/с – СШ Анастасія Тукай.
Начальнік упраўлення па адукацыі, спорце і турызме райвыканкама Алена Карповіч адзначыла, што конкурс для маладых педагогаў стаў традыцыяй у нашым раёне. Для настаўнікаў-пачаткоўцаў ён з'яўляецца адным са сродкаў павышэння прафесіяналізму, ну і, вядома ж, магчымасцю гучна заявіць пра сябе і падзяліцца новымі адкрыццямі і ўвабраць вопыт іншых.
- На мой погляд, не так ужо важныя перамогі і прызы, - кажа Алена Алегаўна. - Важная сама атмасфера інтэлектуальнай напругі, яднаючая атмасфера сатворчасці. Натуральна, мерапрыемства патрабуе вялікіх інтэлектуальных затрат, але яно нараджае ўпэўненасць ва ўласных сілах і накіроўвае наперад.
Конкурс праходзіў са студзеня па красавік 2022 года ў тры этапы. У першым бралі ўдзел адзінаццаць маладых педагогаў, а ў фінал выйшлі пяць удзельнікаў. Першы этап - правядзенне ўрока (навучальных заняткаў, мерапрыемства) у сваёй установе адукацыі па абранай маладым педагогам тэматыцы. Другі - прадастаўленне з заяўкай відэаўрока і эсэ «Мая прафесія - настаўнік (выхавальнік, педагог сацыяльны, педагог-псіхолаг, настаўнік-дэфектолаг)». Трэці – творчае самапрадстаўленне ўдзельніка на тэму «Мой педагагічны поспех».
Усе ўдзельнікі прайшлі сур'ёзныя выпрабаванні і з заданнямі справіліся годна, тым самым паказаўшы свае прафесійныя здольнасці і талент. І нягледзячы на тое, што ў маладых настаўнікаў зусім невялікі працоўны стаж, кожны прадэманстраваў свой бясцэнны вопыт і ўмелыя ўменні, а на іх занятках заўсёды цікава і пазнавальна.
Вельмі складанай была праца прафесійнага журы ў выбары лепшага сярод лепшых канкурсантаў. Як адзначыла загадчыца раённага навучальна-метадычнага кабінета Вера Станкевіч, вельмі складана сярод усіх таленавітых удзельнікаў выбраць самага лепшага. Яны, безумоўна, вартыя ўзнагарод. Уклаўшы свае ўменні і навыкі, удзельнікі на ўсіх этапах конкурсу паказвалі журы майстэрства і прафесіяналізм, даказаўшы, што яны па-за канкурэнцыяй.
Найбольшую колькасць балаў набрала Крысціна Саладуха, якая стала пераможцам конкурсу. Яна ўдастоена Дыплома пераможцы раённага конкурсу «Шлях у прафесію-2022» і падарунка ад упраўлення па адукацыі, спорце і турызме райвыканкама. Усім канкурсантам таксама ўручылі сувеніры ад раённага камітэта прафсаюза работнікаў адукацыі і навукі.
- Я рада, што прыняла ўдзел у конкурсе, - кажа Крысціна Юр'еўна. - Велізарную дапамогу ў падрыхтоўцы да конкурсу аказаў дружны калектыў СШ №3 г. Капыля і мой муж. Бо тамака, на сцэне, я была адна, а падрыхтоўкай займаліся мы разам: складалі, рэпетавалі. Усе ўдзельніцы былі добра падрыхтаваныя і добразычлівыя. У выступленні кожнай была свая разыначка.
Наталля Давыдзенка
Крыніца http://www.kopyl.by